لاہور: استحکام پاکستان پارٹی (آئی پی پی) کے صدر عبدالعلیم خان نے کہا ہے کہ مسئلہ کشمیر کے حل کے بغیر خطے میں امن ممکن نہیں۔

یوم یکجہتی کشمیر پر عبدالعلیم خان نے اپنے جاری کردہ پیغام میں کہا کہ کشمیریوں کی جہد آزادی میں ہم آواز ہونے کا نام یوم یکجہتی کشمیر ہے، مسئلہ کشمیر جنیوا کنونشن کے تحت حل کیا جانا ہی اس مسلے کا حل ہے۔

انہوں نے کہا کہ کشمیر میں انسانی حقوق کی پامالی اور نسل کشی افسوسناک ہے، ثابت ہو چکا کہ مسئلہ کشمیر کے حل کے بغیر خطے میں امن ممکن نہیں۔

صدر آئی پی پی نے کہا کہ آزادی کشمیریوں کا حق ہے، بھارتی غاصبانہ قبضہ ان کی حق تلفی ہے، اقوام متحدہ اور عالمی ادارے کشمیر میں ہونے والے مظالم کو رکوائیں۔

یہ بھی پڑھیں: یوم سیاہ؛ کشمیری عوام سے اظہار یکجہتی کیلئے دفتر خارجہ سے ریلی کا آغاز

عبدالعلیم خان نے کہا کہ کشمیریوں کے حق خودارادیت کو تسلیم کرنا عالمی امن کے لئے ضروری ہے، کشمیریوں پر جاری بھارتی مظالم نے انسانیت کو بھی شرمندہ کر دیا، سیکولر بھارت کا غاصبانہ اور انسانیت سوز رویہ قابل مذمت ہے۔

انہوں نے مزید کہا کہ بھارتی مظالم نے کشمیریوں پر زندگی تنگ کر دی ہے، پاک فوج نے مسئلہ کشمیر کو بردباری اور معاملہ فہمی سے ہینڈل کیا ہے، پاک فوج کی امن پسندی اور دانشمندی کی وجہ سے خطے میں امن قائم ہے۔