ترجمان دفتر خارجہ کا کہنا ہےکہ بھارتی ہٹ دھرمی سارک تنظیم کی کامیابی کی راہ میں رکاوٹ ہے۔

 ترجمان دفتر خارجہ ممتاز زہرا بلوچ نے میڈیا کو ہفتہ وار بریفنگ دیتے ہوئے کہاکہ غزہ میں فلسطینیوں کے قتل کی مذمت کرتے ہیں، غزہ میں ماہ صیام میں فوری جنگ بندی کا مطالبہ کرتےہیں ، رمضان کی آمد کےموقع پرفلسطینیوں پرپابندیوں کےخاتمےکےحامی ہیں ، فلسطینیوں کو مسجد اقصیٰ میں عبادت کی اجازت دی جائے۔

انہوں نے کہاکہ پاکستان کشمیری بھائیوں کی سفارتی وسیاسی امدادجاری رکھےگا، مقبوضہ کشمیر میں حریت قیادت پر مظالم بند کئے جائیں ، غزہ کے متاثرین کوفوری امداداورطبی سہولتیں فراہم کی جائیں ۔

ترجمان دفتر خارجہ ممتاز زہرا بلوچ نے کہاکہ بھارتی وزیراعظم کی طرف سےوزیراعظم شہباز شریف  کو مبارکباد کی ٹویٹ دیگر ممالک کےتہنیتی پیغامات کی طرح موصول ہوئی ہے ۔

ان کا کہنا تھا کہ نئی کابینہ کی تشکیل ہو رہی ہے ، کابینہ بننے کے بعد نئی حکومت خارجہ پالیسی بنائے گی ۔

ترجمان دفتر خارجہ نے کہاکہ  بھارت سمیت تمام ہمسایوں کےساتھ برابری عزت و احترام کی بنیاد پر قائم کرنے کے خواہاں ہیں ،بھارت مقبوضہ کشمیر میں انسانی حقوق کی خلاف وزریوں کا تدارک کرکے مسئلہ کشمیر حل کرے تو بات چیت شروع کی جاسکتی ہے، پاک بھارت تنازعہ یا مسئلہ کشمیر کے حل کے لئے کسی بھی دوست ملک سے ثالثی کا خیر مقدم کریں گے۔

ان کا کہنا تھا کہ سارک میں ایک ہی رکن ملک ہے جو تنظیم کو آگے نہیں بڑھنے دے رہا ، بھارت نے سال 2016 میں پاکستان میں سارک کا اجلاس رکوانے کی ہر ممکن کوشش کی بھارت واحد ملک ہے جو علاقائی تعاون کی راہ میں رکاوٹ ہے ،بھارتی ہٹ دھرمی سارک تنظیم کی کامیابی کی راہ میں رکاوٹ ہے ،بھارت نے سارک اور علاقائی رابطوں کو مفلوج کردیا ہے ،دو ہزار سولہ کے بعد سارک سربراہ کانفرس منعقد نہیں ہوسکی۔