پنجاب بھر میں پتنگ بازی کا شوق اور ظالم ڈور جانی دشمن بن گئے ہیں ، کریک ڈاؤن کے باوجود 24 گھنٹوں کے دوران پتنگ بازی سے مزید 2 بچے جان کی بازی ہار گئے۔

وزیراعلیٰ پنجاب مریم نواز شریف  نے دھاتی ڈور بنانے، بیچنے اور خریدنے والوں کے خلاف کریک ڈاؤن کا حکم دیا ہے، ان کےاحکامات پرپتنگ بازی میں ملوث افراد کے خلاف سخت کارروائی کا آغاز کردیا ہے۔

خوشاب میں پولیس نے بلال نامی پتنگ فروش کو رنگے ہاتھوں گرفتار کر لیا، پولیس کا کہنا ہےکہ پتنگ بازی کی آڑمیں انسانی جانوں سے کھیلنےکی اجازت نہیں ہے۔

میانوالی میں 2 سالہ کمسن بچے کے گلے پرڈور پھر گئی، پولیس نے بچے کے والد کی مدعیت میں پتنگ فروش پرمقدمہ درج کر کے ملزم اصغر کو حراست میں لے لیا ہے۔

اس سے قبل سرگودھا میں والدین کا اکلوتا کمسن بچہ پتنگ لوٹتے وقت کرنٹ لگنے سے جان سے ہاتھ دھو بیٹھا تھا۔

گوجرانولہ میں بھی بارہ سالہ سمیر پتنگ اڑاتے ہوئے کرنٹ لگنے سے جھلس کر شدید زخمی ہوگیا۔

دوسری جانب پنجاب پولیس کی صوبے بھر میں پتنگ فروشوں اور پتنگ اڑانے والوں کے خلاف کارروائیاں جاری ہیں۔

اوکاڑہ سے 221 افراد کو گرفتار کیاگیا، کھاریاں، پتوکی، گجرات، رینالہ خورد اور خان پور سے بھی تیس سے زائد پتنگ فروش پکڑے گئے، پاکپتن سے بھی دو پتنگ فروش گرفتار کرلیا گیا ۔