اسلام آباد: شہباز شریف نے بطور وزیراعظم پاکستان کے عہدے کا حلف اٹھا لیا ہے۔

شہباز شریف کی بطور وزیراعظم حلف برداری کی تقریب ایوان صدر میں ہوئی جس میں صدر مملکت ڈاکٹر عارف علوی نے شہباز شریف سے بطور وزیراعظم پاکستان کے عہدے کا حلف لیا۔

شہباز شریف نے وزیر اعظم پاکستان کے عہدے کا حلف اُٹھا لیا
براہ راست دیکھیں:https://t.co/vaK1egyZCN #BOLNews #PrimeMinisterofPakistan #ShehbazSharif pic.twitter.com/aMIjfO1x9c

— BOL Network (@BOLNETWORK) March 4, 2024

شہباز شریف نے اسلامی جمہوریہ پاکستان کے 24 ویں وزیر اعظم پاکستان کے عہدے کا حلف اٹھایا ہے۔

حلف برداری کی تقریب میں آرمی چیف جنرل سید عاصم منیر، نگران وزیراعظم انوار الحق کاکڑ، چیئرمین سینیٹ صادق سنجرانی اور اسپیکر قومی اسمبلی سردار ایاز صادق نے شرکت کی۔

 اس کے علاوہ چاروں صوبوں کے گورنرز، وزرائے اعلیٰ بھی تقریب حلف برداری میں شریک تھے۔

وزیراعظم شہباز شریف کو گارڈ آف آنر پیش

وزیراعظم شہباز شریف کی حلف برداری کے بعد وزیراعظم ہاؤس میں مسلح افواج کی جانب سے انہیں گارڈ آف آنر پیش کیا گیا جبکہ سبکدوش ہونے والے نگران وزیراعظم انوار الحق کاکڑ کو بھی گارڈ آف آنر پیش کیا گیا۔

بعدازاں وزیراعظم شہباز شریف سے وزیراعظم آفس کے عملے کا تعارف بھی کروایا گیا جبکہ شہباز شریف سے نگران وزیراعظم کے منصب سے سبکدوش ہونے والے انوارالحق کاکڑ کی ملاقات بھی ہوئی۔

واضح رہے کہ گزشتہ روز شہباز شریف اسلامی جمہوریہ پاکستان کے 24 ویں وزیر اعظم منتخب ہوئے، قومی اسمبلی میں قائد ایوان کیلئے ہونے والے انتخاب میں شہباز شریف نے 201 اراکین کی حمایت حاصل کی جبکہ ان کے مد مقابل سنی اتحاد کونسل کے عمر ایوب نے 92 ووٹ لیے۔

مسلم لیگ ن کے صدر شہباز شریف کو اپنی پارٹی کے ساتھ پیپلز پارٹی کی حمایت بھی حاصل تھی جبکہ متحدہ قومی موومنٹ (ایم کیو ایم) نے بھی ووٹ دینے کی ہامی بھری تھی۔