پاکستان مسلم لیگ (ن) کے رہنما حنیف عباسی نے کہا ہے کہ اس وقت کسی بھی جماعت کیلئے حکومت پھولوں کی سیج نہیں۔

حنیف عباسی نے اتحادی رہنماؤں کے ہمراہ میڈیا سے گفتگو کرتے ہوئے کہا کہ آئی ایم ایف کو خط پی ٹی آئی کا ملک دشمنی پر مبنی فیصلہ ہے، آپ الیکشن کی شفافیت پر سوالیہ نشان لگارہے ہیں۔

انہوں نے کہا کہ گھر کا معاملہ گھر کے اندر ہی حل ہونا چاہیے، سب کو قوم کی خدمت کرنا پڑے گی، ایک جماعت کہتی ہے میں نہ مانوں، ایک جماعت ملک کے عدم استحکام کیلئے کام کررہی ہے۔

لیگی رہنما کا کہنا تھا کہ ملک کو جمہوریت کی جانب لیکر جانا ہمارا فرض ہے، کسی بھی جماعت کیلئے حکومت پھولوں کی سیج نہیں۔

حنیف عباسی نے مزید کہا کہ انتخابی جماعتوں سے ملکر شہباز شریف کو 200 ووٹ ملیں گے، مہنگائی، غربت اور دیگر مسائل کو ملکر حل کرنا ہے۔

ایم کیو ایم ن لیگ کے ساتھ کھڑی ہے، امین الحق

دوسری جانب ایم کیو ایم رہنما امین الحق نے کہا کہ ملک میں سیاسی استحکام آئے گا تو معاشی استحکام آئےگا، ایم کیو ایم کی خواہش ہے سیاسی مذاکرات کا آغاز کیا جائے۔

انکا کہنا تھا کہ آج شہباز شریف کو 200 سے زائد ووٹ ملیں گے، ایم کیو ایم ن لیگ کے ساتھ کھڑی ہے، ملک میں سیاسی ڈائیلاگ چاہتے ہیں، ایم کیو ایم سمجھتی ہے 8 فروری کا الیکشن آزادانہ، صاف اور شفاف تھا، ہونا یہ چاہیے کہ ملک میں سیاسی استحکام لایا جائے۔

ملک کے حالات اس وقت اچھے نہیں، اعجاز جاکھرانی

اس موقع پر پیپلزپارٹی کے رہنما اعجاز جاکھرانی کا کہنا تھا کہ اپوزیشن سے کہتا ہوں ملک کی بہتری کیلئے ملکر کام کریں، ملک کے حالات اس وقت اچھے نہیں۔

انہوں نے مزید کہا کہ ہماری پارٹی نے جمہوریت کی خاطر قربانیاں دی ہیں، شہید ذوالفقار علی بھٹو اور شہید بینظیر بھٹو نے جمہوریت کی خاطر قربانیاں دیں، پاکستان پیپلز پارٹی نے ہمیشہ ملک کو آگے لے جانے کی بات کی۔