وزیراعلیٰ سندھ سید مراد علی شاہ نے 22.5 بلین روپے کے رمضان پیکج کا اعلان کردیا ہے۔

وزیراعلیٰ مراد علی شاہ کی زیر صدارت رمضان المبارک میں قیمتوں کو کنٹرول کرنے سے متعلق اعلیٰ سطح کا اجلاس ہوا جس میں سندھ کی 60 فیصد آبادی کو 5000 روپے نقد رمضان میں دینے کی منظوری دیدی گئی۔

اجلاس کے دوران وزیراعلیٰ سندھ نے 22.5 بلین روپے کے رمضان پیکج کا اعلان کردیا اور مینیمم ویج والے 4.5 ملین خاندانوں کو رمضان میں ریلیف دینے کا فیصلہ کیا۔

اجلاس میں بتایا گیا کہ مینیمم ویج کا مقصد جن کی ماہانہ آمدن 34000 روپے ہیں، ماہانہ 32000 روپے کمانے والے خاندان صوبے کی آبادی کا 60 فیصد بنتا ہے، ہر خاندان کو رمضان کے مہینے میں 5000 روپے بینک کے ذریعے دیے جائیں گے، اگر 3.5 ملین خاندان کو 5000 روپے دیے جائیں گے تو حکومت پر 22.5 بلین روپے سے زیادہ رقم بنتی ہے۔

اجلاس میں ذخیرہ اندوزوں اور منافع خوروں کے خلاف آج سے کریک ڈاؤں کرنے کا بھی فیصلہ کیا گیا۔

وزیراعلیٰ سندھ نے کمشنر کو ہدایت دی کہ خیرہ اندوزوں اور منافع خوروں کے خلاف کراچی میں آج ہی سے کریک ڈائوں شروع کیا جائے اور صوبے کے باقی ڈویژنوں میں بھی کمشنرز متعلقہ اضلاع میں منافع خوروں اور ذخیرہ اندوزوں کے خلاف کریک ڈاؤن شروع کریں۔

دوران اجلاس کمشنر کراچی نے کہا کہ ہم نے اشیائے خردونوش کی پرائس نوٹیفائے کر دی ہیں۔

وزیراعلیٰ سندھ نے کہا کہ انتظامیہ اشیا کی نوٹیفائیڈ قیمتوں کو مارکیٹ میں یقینی بنائے، میں خود بھی اچانک پرائس چیک کرنے کے لیے نکلوں گا۔

مراد علی شاہ نے مزید کہا کہ محکمہ زکوٰ سندھ 110000 غریب خاندانوں کو 14000 روپے ادا کرے گی، صوبے بھر میں سحر و افطار کے دوراں لوڈشیڈنگ نہیں ہونی چاہیے، رمضان المبارک میں کےالیکٹرک، حیسکو اور سیپکو اپنے متعلقہ علاقوں میں بجلی کا نظام بہتر رکھے۔

واضح رہے کہ اجلاس میں میئر کراچی، چیف سیکریٹری، پرنسپل سیکریٹری، آئی جی پولیس، سیکریٹری فنانس، ایڈیشنل آئی جی پولیس، کمشنر کراچی اور دیگر متعلقہ افسران شریک تھے جبکہ دیگر ڈویژن کے کمشنرز اور ڈی آئی جیز نے بذریعہ وڈیو لنک اجلاس میں شرکت کی۔