لاہور: اسپیکر پنجاب اسمبلی ملک محمد احمد خان نے کہا ہے کہ نوجوان کو مناسب مواقع میسر ہوں تو بہتر نتائج مل سکتے ہیں۔

اسپیکر ملک محمد احمد خان سے برٹش ہائی کمیشن کی پولیٹیکل کونسلر زو ویئر کی اسمبلی چیمبر میں ملاقات ہوئی جس میں باہمی دلچسپی ملکی صورتحال اور پارلیمنٹ کی بالادستی سمیت دیگر امور پر تبادلہ خیال کیا گیا۔

ملاقات میں پنجاب اسمبلی کے اسپیکر ملک احمد نے گفتگو کرتے ہوئے کہا کہ پاکستان کے لئے تعلیم سمیت مختلف شعبوں میں برطانوی اداروں کی شراکت لائق تحسین ہے۔

انہوں نے کہا کہ پارلیمانی وفود کے تبادلے، معاشی تعاون اور عوامی سطح پر رابطوں سے دونوں ممالک کے مابین تعلقات کو مزید مستحکم کیا جا سکتا ہے، دو طرفہ تعاون کو انڈسٹری، زراعت اور دیگر شعبوں میں فروغ دینے کی گنجائش موجود ہے، اگر نوجوان کو مناسب مواقع میسر ہوں تو بہترنتائج مل سکتے ہیں۔

دوران ملاقات اسپیکر پنجاب اسمبلی نے پولیٹیکل کونسلر کو پنجاب اسمبلی میں ہونیوالی قانون سازی اور کمیٹی سسٹم سے آگاہ کیا۔

دوسری جانب پولیٹیکل کونسلر زو ویئر نے ملک محمد احمد خان کو اسپیکر پنجاب اسمبلی منتخب ہونے پر مبارکباد دی اور نیک خواہشات کا اظہار کیا۔

پولیٹیکل کونسلر زو ویئر نے مزید کہا کہ انگلینڈ میں لاکھوں پاکستانی مختلف شعبوں میں شاندار طریقے سے خدمات سر انجام دے رہے ہیں، برطانیہ اورپاکستان کے مابین خوشگوار تعلقات بڑھانے کے لیے ہم اپنا بھر پور کردار ادا کریں گے۔

واضح رہے کہ اس موقع پر وفد میں برٹش ہائی کمیشن لاہور کی ہیڈ کلارا سترادج اور پولیٹیکل ایڈوائز برٹش ہائی کمیشن طلال رضا موجود تھے جبکہ سیکرٹری پنجاب اسمبلی چوہدری عامر حبیب، ایڈیشنل سیکرٹری ملک خلیل احمد، اسٹاف آفیسر برائے اسپیکر عماد حسین بھلی اور ترجمان اسمبلی راؤ ماجدعلی بھی موجود تھے۔