وفاقی وزیر اطلاعات و نشریات عطا اللہ تارڑ نے کہا ہے کہ حکومت معاشی اصلاحات کے ایجنڈے کو تیزی سے آگے بڑھانے کے لیے پرعزم ہے۔

عطا تارڑ نے اسلام آباد میں پریس کانفرنس کرتے ہوئے کہا کہ ایف بی آر کی تنظیم نو اور ٹیکس بڑھانے کے اقدامات کر رہے ہیں، ٹیکس حجم بڑھانے والوں کو پہلی بار اعزازات دیے جارہے ہیں۔

انہوں نے کہا کہ حکومتی اخراجات کم کرنے کی کوشش کر رہے ہیں اور ایف بی آر کی ڈیجیٹلائزیشن کے لیے اقدامات کیے جا رہے ہیں، غریب عوام پر سے ٹیکسوں کا بوجھ کم کریں گے۔

وفاقی وزیر نے کہا کہ وزیراعظم کی تمام تر توجہ معاشی اصلاحات پر موکوز ہے، پہلے بھی امن قائم کیا تھا اب پھر امن قائم کریں گے۔

انکا کہنا تھا کہ پی ٹی آئی ٹوٹ پھوٹ کا شکار ہے، تحریک انصاف میں فارورڈ بلاک کی خبریں آرہی ہیں، پی ٹی آئی رہنما آپس میں دست وگریباں ہیں۔

عطا تارڑ نے کہا کہ گوہر خان ایک بات کرتے ہیں، شیرافضل مروت دوسری، کوئی کہتا ہے ایم ڈبلیو ایم کو دوسرا کہتا ہے، سنی اتحاد کونسل کو جوائن کرنا ہے، اندرونی سیاست چھوڑ کر میثاق معیشت کی طرف آئیں۔

انہوں نے کہا کہ گوادر پورٹ حملے کی ذمہ داری بی ایل اے نے قبول کی تھی، گوادر میں ہلاک دہشت گرد کو مسنگ پرسن بتایا جارہا تھا، گوادر پورٹ حملہ دراصل ملکی معیشت پر حملہ ہے۔

وفاقی وزیر نے مزید کہا کہ پولیس قانون نافذ کرنے والے اداروں پر پورا اعتماد ہے، جانوں کی قربانیاں پیش کرنے والے شہداء کو سلام پیش کرتے ہیں، ملکی سلامتی کے لیے دی جانے والی قربانیاں رائیگاں نہیں جائیں گی۔