پاکستان نے غزہ میں جنگ بندی کے مطالبے پر مبنی اقوام متحدہ کی سلامتی کونسل کی قرارداد کا خیر مقدم کرتے ہوئے اس بات پر زور دیا ہے کہ طویل انتظار کے بعد منظور ہونے والی قرارداد پر عمل درآمد ہونا چاہیے۔

اقوام متحدہ میں پاکستان کے مستقل مندوب منیر اکرم نے سلامتی کونسل کی قرارداد کی منظوری کے حوالے سے کہا کہ پاکستان غزہ جنگ بندی قراردادمنظورہونےکاخیرمقدم کرتا ہے اور عملدرآمد پر زور دیتا ہے۔

مستقل مندوب منیراکرم نے مزید کہا کہ پاکستان غزہ میں تحفظ اور سامان کے داخلے کے لیے کردار ادا کرتا رہے گا، غزہ میں اسرائیلی جارحیت روکنے کا پہلا قدم ہے۔

واضح رہے کہ گزشتہ روز اقوام متحدہ کی سلامتی کونسل میں غزہ جنگ بندی کی قرارداد منظور کر لی گئی تھی، یہ قرار داد سلامتی کونسل کے 10 منتخب ارکان نے پیش کی تھی۔

اس قرارداد کی 14 رکن ممالک نے حمایت کی جبکہ امریکہ نے ووٹنگ میں حصہ نہیں لیا، تاہم جنگ بندی کی قرارداد سلامتی کونسل کے 10 منتخب ارکان نے پیش کی تھی، قرارداد پیش کرنے والوں میں الجزائر، جاپان اور جنوبی کوریا شامل تھے۔

دوسری جانب اسرائیل کے تازہ فضائی حملوں میں غزہ کے وسطی علاقے دیر البلاح میں کم از کم 22 اور جنوب میں رفح میں 30 فلسطینی ہلاک ہوئے۔

یاد رہے کہ 7 اکتوبر سے اب تک غزہ پر اسرائیلی حملوں میں کم از کم 32,333 فلسطینی شہید اور 74,694 زخمی ہو چکے ہیں۔