پی ٹی آئی انٹرا پارٹی الیکشن پر پاکستان تحریک انصاف کے بانی رہنما اکبر ایس بابر نے سوالات اٹھا دیے۔ ملک میں شفاف الیکشن کا مطالبہ کرنے والوں کا انٹرا پارٹی الیکشن کی تاریخ میں ایک نیا سیاہ باب سامنے آگیا ہے۔

اکبر ایس بابر نے اپنے جاری کردہ بیان میں کہا کہ ساڑھے آٹھ لاکھ (850,000) پی ٹی آئی ممبران میں سے نو سو چالیس (940)، یعنی صفر اعشاریہ ایک ایک یا 0.11 فیصد پی ٹی آئی ممبران نے تازہ ترین انڑا پارٹی الیکشن میں ووٹ ڈالا۔

تحریک انصاف کے بانی رہنما نے کہا کہ اب آپ ہی بتائیں انٹرا پارٹی الیکشن کے نام پر اس فراڈ کو کیسے تسلیم کریں۔

انہوں نے مزید کہا کہ کل مورخہ 5 مارچ کو الیکشن کمیشن آف پاکستان میں تازہ ترین پی ٹی آئی انٹرا پارٹی الیکشن کو چیلنج کیا جائے گا۔

واضح رہے کہ گزشتہ روز پاکستان تحریک انصاف کے انٹرا پارٹی انتخابات میں بیرسٹر گوہر علی خان بلا مقابلہ چیئرمین اور عمر ایوب خان بلامقابلہ سیکرٹری جنرل منتخب ہوگئے۔

تحریک انصاف کے انٹراپارٹی انتخابات کے نتائج کا اعلان کرتے ہوئے پارٹی کے چیف الیکشن کمشنر رؤف حسن نے کہا تھا کہ وفاق اور چار صوبوں میں انٹراپارٹی انتخابات ہوئے جس میں پارٹی رہنماؤں نے اپنے پینلز کے ہمراہ حصہ لیا، بیرسٹر گوہر خان بلامقابلہ چیئرمین منتخب ہو گئے جب کہ عمر ایوب سیکرٹری جنرل منتخب ہوئے۔

انکا کہنا تھا کہ بلوچستان کے علاوہ باقی صدور بلا مقابلہ منتخب ہوئے، خیبرپختونخوا میں پارٹی صدر کے عہدے کے لیے علی امین گنڈاپور اور پنجاب میں یاسمین راشد جب کہ سندھ میں حلیم عادل شیخ بلا مقابلہ صدر منتخب ہوئے ہیں۔

رؤف حسن نے مزید کہا تھا کہ بلوچستان سے تین امیدواروں کے پینل سامنے آئے جہاں منیر بلوچ کے مقابلے میں داؤد شاہ کا پینل کامیاب ہوا اور بلوچستان کی پی ٹی آئی قیادت نوجوان کے ہاتھ میں آگئی۔