اسلام آباد: وفاقی وزیر توانائی سینیٹر مصدق ملک نے کہا ہے کہ کھاد کی رقم براہ راست کسانوں کو دینے کا فیصلہ کیا ہے۔

وفاقی وزیر مصدق ملک نے پریس کانفرنس کرتے ہوئے کہا کہ بینکوں کو پابند کیا جارہا ہے چھوٹے چھوٹے قرضے فراہم کرے، بینکوں کو چھوٹے کاروبار کیلئے آسان قرضوں کی فراہمی کا پابند کیا جائے گا۔

انہوں نے کہا کہ 5لاکھ بچوں کومشین لرننگ اورآرٹی فیشیل انٹیلی جنس کورس کرانے کا فیصلہ کیا ہے، بچیوں اور بچوں کو مشین لرننگ یا آرٹیفیشل انٹیلیجنس کی ٹریننگ دی جائےگی، بیرون ممالک سے ماسٹر ٹرینرز کو بلوا کر تربیت دلوائی جائے گی۔

مصدق ملک نے کہا کہ کھاد پر سبسڈی کی بجائے کسان کو ڈائریکٹ پیسے دینے کا فیصلہ ہوا ہے، کسانوں کو سولر ٹیوب ویلز دینے کا فیصلہ کیا ہے، زیادہ پیداوار والے بیج کسانوں کی پہنچ میں لائیں گے۔

انکا کہنا تھا کہ 30 سے 35فیصد پھل مارکیٹ میں آنےسے پہلے ہی ضائع ہوجاتے ہیں، پھلوں کو محفوظ کرنے کیلئے ایک زرعی انڈسٹریل فارم بنایا جانا چاہیے۔

وفاقی وزیر نے کہا کہ وزیراعظم نے دیہی، شہری علاقوں کیلئے الگ الگ اسٹریٹجی بنادی ہیں، کسان کو بیج، کھاد اور پانی چاہیے، اگر یہ تینوں چیزیں کسان کو مل جائیں تو گرین انقلاب آجائے۔

انہوں نے مزید کہا کہ معاشرے میں بہت زیادہ تناؤ کو کم کرنے کی ضرورت ہے، کوشش ہے معاشرے میں رواداری کی فضا قائم کریں، رواداری کی فضا پیدا کرنا وقت کی اہم ضرورت ہے، اس طرح گھر نہیں ملک کیسے چلے گا۔