اسلام آباد: پاکستان اور جاپان نے مشترکہ اہداف کے حصول کیلئے ملکر کام کرنے کے عزم کا اعادہ کیا ہے۔

وفاقی وزیر خزانہ محمد اورنگزیب سے جاپانی سفیر کی ملاقات ہوئی جس میں میں دونوں ممالک کے درمیان دوطرفہ تعلقات پر بات چیت ہوئی۔

جاری کردہ اعلامیے کے مطابق ملاقات میں جاپان کے سفیر نے وزیر خزانہ کو عہدہ سنبھالنے پر مبارکباد پیش کی، دونوں ممالک نے مختلف امور پر دو طرفہ تعاون کو مزید بڑھانے پر اتفاق کیا۔

اعلامیے میں بتایا گیا ہے کہ دوران ملاقات پاکستان اور جاپان نے مشترکہ اہداف کے حصول کیلئے ملکر کام کرنے کا بھی عزم کیا اور وزیر خزانہ نے پاکستان کی معیشت کے مختلف پہلوؤں پر بھی روشنی ڈالی۔

ملاقات میں وزیر خزانہ محمد اورنگزیب نے گفتگو کرتے ہوئے کہا کہ پاکستان میکرو اکنامک استحکام کیلئے پر عزم ہے، ٹیکس ٹو جی ڈی پی کے تناسب میں اضافہ ترجیحات میں شامل ہے۔

وفاقی وزیر خزانہ نے جاپانی سفیر کو توانائی شعبے اصلاحات کے بارے میں بھی آگاہ کیا اور کہا کہ بجلی کی تقسیم کار کمپنیوں کے گورنس کے مسائل ہیں، ڈسکوز میں گورنس کے مسائل کو نجی شراکت داری سے حل کریں گے، ڈسکوز کے مسائل کیلئے مکمل نجکاری بھی آپشن ہے۔

دوسری جانب جاپانی سفیر نے کہا کہ 80 جاپانی کمپنیاں اس وقت پاکستان میں کام کر رہی ہیں۔

اعلامیے میں مزید بتایا گیا کہ جاپانی سفیر نے کار ساز اداروں کے مسائل سے وزیر خزانہ کو آگاہ کیا۔