راولپنڈی: پاکستان تحریک انصاف کے چیئرمین بیرسٹر گوہر خان نے کہا ہے کہ امید ہے عدلیہ ہمیں حسن اور حسین نواز کی طرح انصاف فراہم کرے گی۔

بیرسٹر گوہر خان نے شیر افضل مروت کے ہمراہ اڈیالہ جیل کے باہر میڈیا سے گفتگو کرتے ہوئے کہا کہ القادر ٹرسٹ کیس کی سماعت جاری ہے ساتویں گواہ کا بیان ریکارڈ کیا جارہا ہے، القادرٹرسٹ اپنی نوعیت کا پہلا کیس ہے جو یہ ثابت کرتا ہے سیاسی انتقام کہاں تک پہنچ گیا ہے۔

انہوں نے کہا کہ یہ ایک ٹرسٹ تھا جس میں میں ذاتی طور پر ٹرسٹی کا کوئی کردار نہیں، القادر ٹرسٹ میں بچے مفت تعلیم حاصل کررہے تھے۔

پی ٹی آئی کے چیئرمین نے کہا کہ نیب کے گواہان نے تسلیم کیا ہے بانی پی ٹی آئی کا القادر ٹرسٹ میں کوئی مفاد نہیں، جیل کے اطراف رکاوٹوں کے باعث دو کلو میٹر پیدل چلنا پڑتا ہے۔

انکا کہنا تھا کہ حسن اور حسین 7 سال بعد پاکستان آئے، حسن حسین کے خلاف سپریم کورٹ کا فیصلہ اور جے آئی ٹی کی رپورٹ موجود ہے۔

بیرسٹر گوہر خان نے مزید کہا کہ حسن اور حسین ایک دن عدالت پیش ہوئے دوسرے دن تمام کیسز ختم ہوئے، ان کے ریفرنسز کئی عشروں پر چلنے والے تھے ثبوتوں کی بھی ضرورت نہیں، عدلیہ سے درخواست ہے ہمیں بھی 45 سال انتظار کرا کے پھر یہ نہ کہنا انصاف نہیں ہوا تھا، عدلیہ سے امید ہے وہ ہمیں ان ہی کی طرح انصاف فراہم کرے گی۔