صدر پاکستان آصف علی زرداری کی جانب سے قیدیوں کی سزاؤں میں کمی کے احکامات کے پیش نظر اٹک کی ڈسٹرکٹ جیل میں 71 قیدیوں کی سزا میں 3 ماہ کی کمی کا اعلان کردیا گیا ہے۔

جیل ذرائع نے بتایا ہے کہ سزا میں کمی پانے والے ملزمان معمولی جرائم میں ملوث ہیں۔

جیل ذرائع کے مطابق 23 مارچ کےموقع پر صدر پاکستان نے قیدیوں کی سزاؤں میں کمی کا اعلان کیا تھا۔

واضح رہے کہ دو روز قبل صدرمملکت آصف علی زرداری نے یوم پاکستان اور عید الفطر کے موقع پر قیدیوں کی سزاؤں میں نوے، نوے روز کی کمی کی منظوری دی تھی۔

سزاؤں میں کمی کا اطلاق قتل، جاسوسی، زنا، چوری، ڈکیتی، اغوا اور ریاست مخالف سرگرمیوں میں ملوث قیدیوں پر نہیں ہوگا۔

علاوہ ازیں سزا میں کمی کا اطلاق مالی جرائم اور قومی خزانے کو نقصان پہنچانے والے مجرموں پر بھی نہیں ہوگا جبکہ سزا میں کمی کا اطلاق غیر ملکی افراد ایکٹ، 1946 اور منشیات کنٹرول (ترمیمی) ایکٹ 2022  کے تحت سزا یافتہ افراد پر نہیں ہوگا۔

65 سال سے زائد عمرکے مرد قیدی جو اپنی ایک تہائی قید کاٹ چکے ہیں ان پر اطلاق ہوگا اور 60 سال سے زائد عمر کی خواتین قیدی جو ایک تہائی قید کاٹ چکی ہیں، ان پر بھی سزا میں کمی کا اطلاق ہوگا۔

18 سال سے کم عمر افراد جو اپنی ایک تہائی سزا کاٹ چکے ہیں ان پر بھی سزا میں کمی کا اطلاق ہوگا، تاہم صدر مملکت نے سزاؤں میں کمی کی منظوری آئین کے آرٹیکل 45 اور رولز آف بزنس کے رول 15 اے کے تحت دی۔