صوبائی وزیر محکمہ اسپیشلائزڈ ہیلتھ کیئر اینڈ میڈیکل ایجوکیشن خواجہ سلمان رفیق کی قیادت میں پنجاب ہیومن آرگن ٹرانسپلانٹیشن اتھارٹی کے دفتر شادمان میں گردوں کے عالمی دن کے موقع پر منعقدہ آگاہی واک کا انعقاد ہوا۔

اس موقع پر ڈی جی پی ہوٹا پروفیسر ڈاکٹر شہزاد انور، پروفیسر ڈاکٹر اشرف ضیاء، سینیئر اداکار راشد محمود، سینیئر اداکارہ ممتاز بیگم، کامیڈی اداکار طاہر انجم اور فیکلٹی ممبران سمیت خواتین و حضرات موجود تھے۔

آگاہی واک کے دوران عوام نے ہاتھوں میں پلے کارڈز اٹھا رکھے تھے۔

صوبائی وزیر صحت خواجہ سلمان رفیق نے اس موقع پر ایک اہم اجلاس کی صدارت بھی کی۔ اجلاس میں اظہار خیال کرتے ہوئے انہوں نے کہا کہ انتہائی اہم موضوع پر آگاہی واک کے انعقاد پر ڈی جی پی ہوٹا اور ان کی ٹیم کو شاباش دیتا ہوں۔

خواجہ سلمان رفیق نے کہا کہ پاکستان میں گردوں کی بیماریوں میں خطرناک حد تک اضافہ ہو رہا ہے، ہمیں ایک صحت مند زندگی گزارنے کیلئے صحت مند لائف سٹائل اپنانا ہوگا، آج پوری دنیا میں گردوں کی بیماریوں سے بچاؤ کے حوالہ سے دن منایا جا رہا ہے۔

انکا کہنا تھا کہ پنجاب ہیومن آرگن ٹرانسپلانٹیشن اتھارٹی کی استدکار کو مزید بڑھائیں گے، ایک صحت مند زندگی کیلئے گردوں کی صحت کا خیال رکھنا چاہیے، پنجاب میں ڈائیلسز کی سہولیات کو مزید بہتر بنائیں گے۔

انہوں نے کہا کہ قائد نواز شریف کے ویژن کے مطابق پی کے ایل آئی کو بنانے کا بنیادی مقصد ہی گردوں کے امراض میں مبتلا مریضوں کو بہترین طبی سہولیات فراہم کرنا تھا، انسانی اعضاء کی غیر قانونی پیوندکاری میں ملوث عناصر کے خلاف گھیرا تنگ کر رہے ہیں۔

خواجہ سلمان رفیق نے مزید کہا کہ گردوں کے امراض کے علاج میں مصروف تمام ڈاکٹرز نرسنگ سٹاف کو خراج تحسین پیش کرنا چاہتے ہیں۔

دوسری جانب ڈی جی پنجاب ہیومن آرگن ٹرانسپلانٹیشن اتھارٹی پروفیسر ڈاکٹر شہزاد انور نے بھی اظہار خیال کرتے ہوئے کہا کہ آگاہی واک میں صوبائی وزیر محکمہ سپیشلائزڈ ہیلتھ کیئر اینڈ میڈیکل ایجوکیشن خواجہ سلمان رفیق کی آمد پر شکریہ ادا کرتے ہیں۔

بعدازاں سینیئر اداکار راشد محمود کا کہنا تھا کہ انتہائی اہم دن کی مناسبت سے آگاہی واک کے انعقاد پر پنجاب ہیومن آرگن ٹرانسپلانٹیشن اتھارٹی کو شاباش دیتا ہوں۔