وفاقی وزیر تجارت جام کمال نے کہا ہے کہ ہم اس ملک کی معیشت کے حوالے سے چیزوں کو بہتر کرنے کے لیے کوشاں ہیں۔

وفاقی وزیر تجارت جام کمال نے مزار قائد پر حاضری دی اور  فاتحہ خوانی کی، انہوں نے  مہمانوں کی کتاب میں تاثرات بھی درج کیے۔

اس موقع پر میڈیا سے گفتگو کرتے ہوئے وفاقی وزیر تجارت نے کہاکہ عہدے کو سنبھالنے کے بعد مزار قائد پر حاضری ضروری تھی، یہاں آکر ہمیں پاکستان کےلئے قربانیوں کا احساس ہوتا ہے، یہ ملک پاکستان ہم سب کےلئے اہمیت رکھتا ہے۔

وفاقی وزیر تجارت نے کہاکہ پہلے دن سے وزیر اعظم بڑے جذبے اور محنت کے ساتھ کام کر رہے ہیں، شہباز شریف کی قیادت میں مشکلات کو ختم کرنے کی کوشش کررہے ہیں، وفاقی وزرا اور صوبائی حکومتیں نے نئی ذمہ داریوں کو سنبھال لیا ہے، پاکستان کو بہت چیلنجز کا سامنا ہے لیکن ہمیں اللہ سے بہتری کی امید ہے، یہ سب ہماری محنت پر مبنی ہے۔

 جام کمال نے کہاکہ پیپلز پارٹی اور دیگر جماعتیں جیسے ایم کیو ایم، نیشنل پارٹی وغیرہ ان سب نے مل کے حکومت کی تشکیل میں حصہ ڈالا ہے، وہ الگ بات ہے کہ ہم اس حکومت کا حصہ ہیں یا نہیں لیکن اسے بنانے میں سب کا ہاتھ ہے، ایک نئی حکومت کےلئے مشکلات ضرور ہے۔

ان کا کہنا تھا کہ بلوچستان میں پڑوسی ممالک کی جانب سے مداخلت شامل ہے، کراچی اور لاہور میں ہوسکتا ہے کہ حادثات زیادہ ہوتے ہونگے لیکن کوئٹہ میں حادثات کی خبریں زیادہ چلتی ہے۔

وفاقی وزیر تجارت جام کمال نے مزید کہاکہ بلوچستان کے حالات اس لیے بھی حساس ہیں کہ وہاں دو ممالک کی سرحدیں ہیں، جن وزیر اعلیٰ نے وہاں ذمہ داری لی تو سب نے اپنے لحاظ سے وہاں بہتری کی کوشش ضرور کی ہوگی، اب وہاں پیپلز پارٹی کے وزیر اعلیٰ ہیں، ہماری کوشش ہوگی کہ ان کے مسئلوں کو حل کرنے کی کوشش کی جائے،پاکستان پیپلز پارٹی کی جانب سے بگٹی وزیر اعلیٰ بلوچستان ہے، مسلم لیگ ن سمیت دیگر جماعتیں بھی بلوچستان حکومت کا حصہ ہے۔