کوئٹہ: بلوچستان سے خالی ہونے والی سینیٹ کی 7 جنرل، ٹیکنوکریٹ اور خواتین کی 2،2 نشتوں کے لیے مختلف سیاسی و مذہبی جماعتوں کے 36 امیدواروں نے کاغذات نامزدگی جمع کرا دیے۔

ن لیگ کے اورنگزیب کھیتران، راحت جمالی، آغا شاہ زیب درانی، سید الحسن مندوخیل، راحیلہ حمید درانی اور دیگر نے کاغذات نامزدگی جمع کرائے جبکہ جے یوآئی کے احمد خان خلجی، مولانا عبدالواسع، بی بی کلثوم، امان اللہ کنرانی اور قاری رحمت اللہ کی جانب سے کاغذات جمع کرائے گئے۔

پیپلز پارٹی کے چنگیز جمالی، حسنہ بانو، عمر گورگیج، بلال مندوخیل، طارق مسوری بگٹی نے بھی کاغذات نامزدگی جمع کرادیے جبکہ تاہم پیپلز پارٹی اور عوامی نیشنل پارٹی کے مشترکہ امیدوار جان محمد بلیدی اور ایمل ولی خان نے بھی کاغزات نامزدگی جمع کرائے۔

اس کے علاوہ آزاد امیدوار ڈاکٹرحسین اسلام، اعجاز احمد، ثنا جمالی اور بلوچستان عوامی پارٹی کے انوارالحق کاکڑ، کہدہ بابر، مبین خلجی و دیگر کے بھی کاغذات جمع کرادیے گئے۔

جماعت اسلامی کے زاہد اختر بلوچ، ڈاکٹر عطاء الرحمن اور مولانا عبدالحق ہاشمی نے بھی کاغذات نامزدگی جمع کرائے۔

اس حوالے سے صوبائی الیکشن کمشنر نے بتایا کہ امیدواروں کے ناموں کی ابتدائی فہرست آج جاری کی جائے گی، ریٹرننگ افیسر کی جانب سے کاغذات نامزدگی کی جانچ پڑتال 19 مارچ تک ہوگی اور 21 مارچ تک کاغذات نامزدگی منظور یا مسترد ہونے کے خلاف اپیلیں دائر کی جاسکیں گی۔

انہوں نے مزید کہا کہ ایپلیٹ ٹریبونل 25 مارچ تک اپیلوں پر فیصلے کریں گے، امیدواروں کی نظرثانی شدہ فہرست کی اشاعت 26 مارچ کو ہوگی جبکہ امیدواروں کی جانب سے دستبردار ہونے کی آخری تاریخ 27 مارچ ہے۔

واضح رہے کہ بلوچستان کی 11 نشستوں کے لیے الیکشن کی پولنگ 02 اپریل کو صبح 9 سے شام  4 بجے تک بلوچستان اسمبلی میں ہوگی۔