اسلا آباد: صدارتی انتخابات ملتوی کرنے کیلئے پشتونخوا ملی عوامی پارٹی کے سربراہ محمود خان اچکزئی نے الیکشن کمیشن آف پاکستان کو خط لکھ دیا۔

صدارتی امیدوار محمود خان اچکزئی کی جانب سے صدارتی انتخاب ملتوی کرنے کے لیے الیکشن کمیشن میں درخواست دائر کر دی گئی ہے۔

الیکشن کمیشن کو لکھے گئے خط میں محمود خان اچکزئی نے کہا ہے کہ صدارتی انتخاب کے لیے الیکٹورل کالج مکمل نہیں ہے، الیکٹورل کالج مکمل کیے بغیر صدارتی انتخاب غیر آئینی اور غیر قانونی ہوگا۔

محمود خان اچکزئی کا کہنا تھا کہ سنی اتحاد کونسل کی مخصوص نشستوں کے لیے درخواست پشاور ہائی کورٹ میں زیر سماعت ہے۔

الیکشن سے ایک روز قبل صدارتی امیدوار محمود اچکزئی نے صدارتی انتخاب ملتوی کرنے کا مطالبہ کر دیا۔

واضح رہے کہ الیکشن کمیشن کی جانب سے صدارتی انتخاب کے شیڈول جاری کر دیا گیا، جس کے مطابق صدارتی انتخاب کے لیے پولنگ 9 مارچ کو ہوگی۔

صدارتی الیکشن کا طریقہ کار کیا ہے؟

صدر پاکستان کے انتخاب کا مرحلہ آن پہنچا، ملک کا نیا صدر منتخب کرنے کیلئے انتخابی دنگل 9 مارچ کو سجے گا۔ صدارتی انتخابات آئین کے آرٹیکل 41 اور شیڈول ٹو کے تحت کروائے جائیں گے، چیف الیکشن کمشنر صدارتی انتخاب کے لیے ریٹرننگ افسر کا کردار نبھائیں گے۔

صدارتی انتخاب کے لیے الیکٹورل کالج پارلیمنٹ کے دونوں ایوانوں اور چاروں صوبائی اسمبلیوں پر مشتمل ہے جبکہ مجلس شوریٰ کے ارکان پارلیمنٹ ہاؤس، صوبائی اسمبلیوں کے ارکان متعلقہ اسمبلیوں میں پولنگ میں حصہ لیں گے، تاہم کوئی بھی رکن پارلیمنٹ یا صوبائی اسمبلی صدارتی امیدوار کا تجویز اور تائید کنندہ ہو سکتا ہے۔

صدارتی انتخاب خفیہ رائے شماری کے تحت کروایا جائے گا، نتائج مرتب کرتے وقت مجلس شوریٰ کے ہر رکن کا ووٹ شمار کیا جائے گا۔

صوبائی اسمبلیوں میں ووٹوں کا شمار فارمولے کے تحت کیا جائے گا، امیدوار کے حاصل کردہ ووٹوں کو سب سے چھوٹی اسمبلی کی مجموعی نشستوں سے ضرب دے کر متعلقہ صوبائی اسمبلی کی مجموعی نشستوں سے تقسیم کیا جائے گا۔

فارمولے کے تحت بلوچستان اسمبلی کے بھی ہر رکن کا ڈالا گیا ووٹ شمار کیا جائے گا، دو یا دو سے زائد امیدواروں کے ووٹ برابر ہونے پر قرعہ اندازی کی جائے گی۔