پشاور: خیبرپختونخوا میں مخصوص نشستوں پر ممبران سے حلف نہ لینے کے خلاف اپوزیشن جماعتوں کا احتجاج کا مقام تبدیل کردیا گیا ہے۔

اس حوالے سے لیگی ایم پی اے صوبیہ شاہد نے بتایا کہ اپوزیشن جماعتوں کا احتجاج اب وزیراعلیٰ ہاوس کے بجائے پشاور پریس کلب کے سامنے ہوگا، خواتین کے اصرار پر مشاورت کے بعد جگہ تبدیل کی ہے۔

انہوں نے کہا کہ آج نماز جمعہ کے بعد تمام مخصوص نشستوں پر آنے والی خواتین اور ارکان اسمبلی احتجاج میں شریک ہوں گے۔

اپوزیشن جماعتیں اسپیکر کی جانب سے مخصوص نشستوں پر حلف نہ لینے کے خلاف احتجاج کررہی ہیں، احتجاج میں تمام اپوزیشن کی پارلیمانی پارٹیوں کے ارکان کو شریک ہونے کی دعوت دی گئی ہے۔

اپوزیشن جماعتوں کے احتجاج کا اعلان جمعیت علماء اسلام خیبر پختونخوا کی جانب سے کیا گیا ہے، احتجاج نماز جمعہ کے بعد دوپہر دو بجے ہوگا۔

اس سے قبل صوبائی جنرل سیکریٹری جے یو آئی خیبر پختونخوا مولانا عطاء الحق درویش نے کہا تھا کہ خیبر پختونخوا اسمبلی کی تمام اپوزیشن جماعتیں احتجاج میں شریک ہوں گی، وزیر اعلیٰ ہاؤس کے سامنے اپوزیشن جماعتوں کے تمام ارکان اسمبلی خواتین واقلیت مخصوص احتجاجی پروگرام میں شرکت کریں۔

صوبیہ شاہد کا کہنا تھا کہ تمام اپوزیشن جماعتیں اے این پی، مسلم لیگ، پیپلز پارٹی، پی ٹی آئی پی اور جے یو آئی کے ارکان شریک ہوں گے۔

اپوزیشن جماعتوں نے کہا ہے کہ اسپیکر کی جانب سے اسمبلی اجلاس نہ بلانے اور مخصوص نشستوں پر حلف نہ لیکر آئین شکنی کررہے ہیں۔