کراچی: متحدہ قومی موومنٹ پاکستان (ایم کیو ایم) کے سینیئر رہنما فیصل سبزواری نے کہا ہے کہ اعلان کرتے ہیں کہ ہم محلہ چوکیدار سسٹم دوبارہ بنائیں گے، کوئی روک سکتا ہے تو روک لے۔

فیصل سبزواری نے ارکان صوبائی اسمبلی کیساتھ پاکستان ہاؤس میں پریس کانفرنس کرتے ہوئے کہا کہ 16 سال سے وزارت داخلہ پیپلزپارٹی کے پاس ہے، کوئی شہری آج کراچی میں محفوظ نہیں ہے، سندھ حکومت اپنی جیت کے خمار سے ہی باہر نہیں آرہی۔

انہوں نے کہا کہ کراچی کے اسٹریٹ کرمنلزکے خلاف ایکشن نہیں لیا جارہا ہے، رمضان میں بھی ڈکیتی مزاحمت پر کئی شہریوں کوموت کے گھاٹ اتار دیا گیا ہے۔

رہنما ایم کیو ایم نے کہا کہ وزیرداخلہ کراچی آئیں اور وزیر اعلیٰ کے ساتھ بیٹھیں، سندھ پولیس واحد ہے جس سے کئی بارکالی بھیڑیں نکلی ہیں، پولیس کی کالی بھیڑوں کی اعانت کے بغیر کوئی جرم نہیں ہوتا، ایسا نہیں ہے کہ آئی جی سندھ اس سے پہلے یہاں نہیں رہے۔

فیصل سبزواری نے مزید کہا کہ اعلان کرتے ہیں کہ ہم محلہ چوکیدار سسٹم بنائیں گے، پورے سندھ میں امن و امان کی صورتحال بہترنہیں ہے، وزیر داخلہ صاحب! منہ کھولنے سے پہلے آنکھیں کھولیں، آپ پر بھاری ذمہ داری ہے، اپنی ذمہ داری نبھائیں، کراچی میں پانی اب سر سے اوپر جا چکا ہے۔

دوسری جانب خواجہ اظہار الحسن کا کہنا تھا کہ مبارک ہو سندھ حکومت کو انکا پسندیدہ آئی جی آگیا، لگتا ہے کچے کے ڈاکوؤں میں خوشی کی لہر دوڑ گئی ہے، کراچی میں رینجرز کو مکمل اختیارات ہیں باقی سندھ میں نہیں ہیں۔

انہوں نے مزید کہا کہ وزیر داخلہ کہتے ہیں کہ کراچی میں اسٹریٹ کرائم کے مسئلے کو ہوا دی جا رہی ہے، ہم سندھ اور وفاقی حکومت سے مطالبہ کرتے ہیں اس معاملے پر نوٹس لیں، وزیر اعظم اور صدر پاکستان بھی تمام تر معاملے پر نوٹس لیں۔