لاہور: وفاقی وزیر اطلاعات عطا اللہ تارڑ نے کہا ہے کہ ہمیں قرضہ نہیں تجارت چاہیے۔

عطا اللہ تارڑ نے تقریب سے خطاب کرتے ہوئے کہا کہ وفاقی کابینہ میں کم عمر ترین وزیر بننے کا مجھے اعزاز حاصل ہے، وزیراعظم کے ہمراہ پہلے غیر ملکی دورہ کے دوران عمرہ کی سعادت حاصل کی، اللہ تعالیٰ نے خانہ کعبہ کے اندر نوافل ادا کرنے کی سعادت عطا کی۔

انہوں نے کہا کہ مسجد نبویﷺ میں تراویح اور ریاض الجنہ میں نوافل ادا کرنے کا موقع ملا، ملکی ترقی اور عوام کی خوشحالی کے لئے خصوصی دعائیں کیں۔

وفاقی وزیر اطلاعات نے کہا کہ حلقہ کے عوام کے روزمرہ کے معاملات پر خصوصی توجہ دی جا رہی ہے، نظام کی بہتری کے لئے کوششیں جاری رکھیں گے، ہمیں پارٹی نے ہمیشہ عزت دی ہے، تمام کارکنوں نے مل کر حلقہ کے مسائل کو حل کرنا ہے۔

انکا کہنا تھا کہ ملک کے معاشی حالات میں بہتری آ رہی ہے، سعودی عرب کے ولی عہد نے 5 ارب ڈالر کی سرمایہ کاری کا اعلان کیا، سعودی عرب پاکستان کے ساتھ دیرپا تعلقات کا خواہاں ہے، سعودی میڈیا نے وزیراعظم کے دورے کو خصوصی کوریج دی۔

عطا اللہ تارڑ نے کہا کہ ہمیں قرضہ نہیں تجارت چاہیے، پاکستان کی قیادت نے امداد کی بجائے سرمایہ کاری کو ترجیح دی ہے، سعودی عرب کی جانب سے پانچ ارب ڈالر کی سرمایہ کاری کے اعلان کے بعد اسٹاک ایکسچینج میں نمایاں تیزی آئی۔

انہوں نے مزید کہا کہ ٹیکس سسٹم کو بہتر کرنا چاہتے ہیں، نجکاری پر خصوصی توجہ دی جا رہی ہے، ہمارے دروازے کارکنوں کے لئے کھلے ہیں، کارکنوں کے ساتھ مل کر کام کرنا ہے۔