سیاکوٹ: وفاقی وزیر دفاع خواجہ آصف نے کہا ہے کہ ملک کی معیشت کی اب قرضوں پر نہیں بلکہ سرمایہ کاری پر چلے گی۔

خواجہ آصف نے نماز عیدالفطر کی ادائیگی کے بعد میڈیا سے گفتگو کرتے ہوئے کہا کہ پوری قوم کو عید مبارک ہو، اس موقع پر فلسطین کو نہیں بھولنا چاہیے، امریکہ سمیت برطانیہ اور یورپ ممالک کا ضمیر سویا ہوا ہے، اس کے علاوہ ہمیں بھی اپنے اعمال کا جائزہ لینا چاہیے۔

انہوں نے کہا کہ رمضان میں اشیاء کی قیمتیں بڑھا دی گئیں، ایک طرف فلسطین میں ظلم کی انتہا ہو گئی ہے دوسری طرف مسلم امہ کی خاموشی ہے۔

وفاقی وزیر نے کہا کہ ہم اپنے فلسطینی اور کشمیری بھائیوں کی مدد نہیں کر سکتے، مسلم امہ کو اس پر غور کرنا ہوگا جہاں جہاں مسلمانوں پر ظلم ہورہا ہے۔

انکا کہنا تھا کہ سعودی عرب کی مہمان نوازی کے شکر گزار ہیں، پی ایم نے صاف کہا کہ ہمیں قرض نہیں چاہیے سرمایہ کاری چاہیے اس کا فوری نتیجہ آیا ہے، محتلف شعبہ جات میں سرمایہ کاری ہوگی۔

وزیر دفاع نے کہا کہ یو اے ای اور قطر سے بھی پی ایم کی بات ہوگئی ہے، ملک کی معیشت کی شکل بدل جائیگی قرضوں پر نہیں بلکہ سرمایہ کاری پر چلے گی۔

خواجہ آصف نے مزید کہا کہ پی ٹی آئی نے معاشی تباہی کی کوئی وعدہ وفا نہیں کیا، انکا لیڈر نوسرباز ہے۔ اب تاریخ میں اسٹاک مارکیٹ اوپر گئی، آئی ایم ایف کا جو پیکیج مل رہا ہے شاید آئندہ اسکی ضرورت نا پڑے، بانی پی ٹی آئی نے کہا تھا کہ پاکستانی فارن انویسٹمنٹ بھیجنا بند کردیں باوجود اسکے فارن ریمیٹنس آئے۔