جامعہ کراچی آج ایران کے صدر ابراہیم رئیسی کو ان کی پاکستان آمد کے موقع پر پی ایچ ڈی کی اعزازی ڈگری دے گی۔

ایرانی صدر ڈاکٹر سید ابراہیم رئیسی کو پی ایچ ڈی کی اعزازی ڈگری دینے کی سفارش گورنر سندھ کامران ٹیسوری نے کی ہے۔

اس حوالے سے جامعہ کراچی کے وائس چانسلر ڈاکٹر خالد عراقی نے بتایا کہ ہفتے کو سنڈیکیٹ کے خصوصی اجلاس میں ایرانی صدر ابراہیم رئیسی کو ڈاکٹریٹ کی اعزازی ڈگری دینے کی منظوری دی گئی۔

جامعہ کراچی کے وائس چانسلر نے کہا کہ اس کیلئے جامعہ کراچی میں خصوصی جلسہ تقسیم اسناد کے انعقاد کا کیا جائے گا۔

واضح رہے کہ ایرانی صدر کے دورہ کراچی کے باعث سندھ حکومت نے آج کراچی ڈویژن میں عام تعطیل کا اعلان کیا ہے۔

دوسری جانب ایران کے صدر ڈاکٹر محمد ابراہیم رئیسی کی آمد سے قبل شہرقائد میں خوش آمدید بینرز آویزاں کردیے گئے ہیں۔ کراچی میں خوش آمدید بینرز فارسی اور انگریزی زبان میں لگائے گئے ہیں، بینرز پر صدرپاکستان اور ایرانی صدر کی تصاویر ہیں۔

بینرز ایئرپورٹ اولڈٹرمینل سے لے کرمیٹروپول شارع فیصل تک لگائے گئے ہیں، خوش آمدید بینرز گورنر ہاؤس روڈ اور سی ایم ہاؤس سے کلفٹن تک بھی لگائے گئے ہیں۔

اس کے علاوہ نرسری سے قائد اعظم کے مزار تک تصاویر اور جھنڈے بھی لگائے گئے ہیں۔

دوسری جانب کراچی میں ایران کے صدر ڈاکٹر محمد ابراہیم رئیسی کی آمد پر ضلع جنوبی کی 3 اہم شاہراہیں آج بند رہیں گی۔

ٹریفک پولیس کے مطابق میٹروپول سے پی آئی ڈی سی جانے والا کلب روڈ مکمل بند رہے گا جبکہ وزیراعلیٰ ہاؤس کے سامنے والا ڈاکٹر ضیاالدین روڈ بھی آج بند رہے گا۔

کلفٹن سے آنے والے ڈاکٹر ضیا الدین روڈ سے پی آئی ڈی سی کی طرف نہیں آسکیں گے جبکہ رینجرز ہیڈ کوآرٹر کے سامنے سے پی آئی ڈی سی جانے والا روڈ بھی بند ہوگا۔

یاد رہے کہ وزیراعلیٰ پنجاب مریم نواز شریف آج ایرانی صدر اور ان کے وفد کا استقبال کریں گی، ایرانی صدر کے اعزاز میں ظہرانے کا اہتمام کیا جائے گا۔

ایرانی صدر مزار اقبال پر حاضری اور بادشاہی مسجد میں نماز ادا کریں گے اور قائداعظم کے مزار کراچی میں بھی حاضری دیں گے۔