وفاقی وزیر داخلہ محسن نقوی نے پاسپورٹ آفس گارڈن ٹاؤن کا دورہ کیا جبکہ شہریوں نے شکایات کے انبار لگا دیے۔

محسن نقوی کی آمد پر پاسپورٹ آفس میں شہریوں کا شدید رش نظر آیا جبکہ شہریوں نے پاسپورٹ بنوانے کے لئے ایجنٹ مافیا کو رقم دینے کے ثبوت بھی دکھائے۔

شہریوں نے وزیر داخلہ محسن نقوی کو بتایا کہ پاسپورٹ آفس کا گیٹ کراس کرنے پر بھی ”ٹیکس” لیا جارہا ہے جبکہ ٹوکن مشین بھی خراب ہیں۔

ڈائریکٹر و اسٹنٹ ڈائریکٹر کسی بھی سوال کا تسلی بخش جواب  نہ دے سکے، وزیر داخلہ محسن نقوی پاسپورٹ آفس کے حالات دیکھ کر برہم ہوئے اور کہا کہ عملے کی ملی بھگت کے بغیر پیسے لینے کا سوال ہی پیدا نہیں ہوتا۔

وزیر داخلہ نے ڈائریکٹر اور اسٹنٹ ڈائریکٹر کو فوری طور پر تبدیل کرتے ہوئے محکمانہ کارروائی کا حکم دیا۔

اس موقع پر محسن نقوی نے پاسپورٹ آفس میں موجود شہریوں سے ملاقات کی اور انکے مسائل پوچھے۔

شہریوں نے وزیر داخلہ محسن نقوی سے شکایت کی کہ پاسپورٹ آفس کی دیواریں بھی پیسے مانگتی ہیں، پیسے دیں تو پاسپورٹ کو پہیے لگ جاتے ہیں، گارڈ سے لیکر ہر کوئی پیسے مانگتا ہے۔

محسن نقوی نے کہا کہ ڈائریکٹر صاحب یہ کیا ہو رہا ہے، ہر کوئی ایجنٹ اور عملے کی جانب سے پیسے لینے کی شکایت کر رہا ہے، آپ کے لئے آیا ہوں، شکایات کا ازالہ کروں گا، خود وزٹ کرکے صورتحال کا جائزہ لیا، شہریوں کو سہولت دینا ہماری ذمہ داری ہے۔

شہریوں نے وفاقی وزیر داخلہ محسن نقوی سے گفتگو کرتے ہوئے کہا کہ آپ نے وزارت اعلیٰ کے دور میں مثالی کام کیا، اب بھی آپ ہی اس دفتر کو ٹھیک کریں گے۔