اسلام آباد: الیکشن کمیشن آف پاکستان نے سینیٹ الیکشن میں کامیاب ہونے والے تمام امیدواروں کی کامیابی کے نوٹیفکیشن جاری کر دیے۔

الیکشن کمیشن نے 48 میں سے 37 نشستوں پر کامیاب امیدواروں کے نوٹیفکیشن جاری کیے جبکہ خیبر پختونخوا کی 11 نشستوں پر انتخابات ملتوی کر دیے گئے تھے۔

پنجاب سے 12 کامیاب امیدواروں کے نوٹیفکیشن جاری کیے گئے جن میں احد چیمہ، پرویز رشید، علامہ ناصر عباس، حامد خان، محسن نقوی، طلال چوہدری اور ناصر محمود شامل ہیں۔

ٹیکنوکریٹ کی نشستوں پر محمد اورنگزیب اور مصدق ملک کی کامیابی کے بھی نوٹیفکیشن جاری کیے گئے جبکہ خواتین کی نشستوں پر انوشہ رحمن اور بشریٰ بٹ کی کامیابی کے نوٹیفکیشن جاری ہوئے، تاہم غیر مسلموں کی ایک نشست پر خلیل طاہر کی کامیابی کا بھی نوٹیفکیشن جاری ہوا۔

بلوچستان سے سینیٹ کے 11 کامیاب امیدواروں کے نوٹیفکیشن جاری کیے گئے جن میں احمد خان، انوارالحق کاکڑ، ایمل ولی خان، جان محمد، سردارعمر گورگیج، سیدال خان، شاہزیب درانی، بلال احمد خان، عبدالواسع، حسنہ بانو، راحت جمالی شامل ہیں۔

سندھ سے سینیٹ کے 12 کامیاب امیدواروں کے نوٹیفکیشن بھی جاری کیے گئے جن میں مسروراحسن، دوست علی جیسر، اشرف جتوئی، کاظم علی شاہ، عامرولی الدین چشتی، فیصل واوڈا، ندیم بھٹو، ضمیرگھمرو، سرمدعلی، قرۃالعین مری، روبینہ قائمخانی شامل ہیں جبکہ سندھ سے اقلیتی رکن پونجو کی کامیابی کا نوٹیفکیشن بھی جاری ہوا۔

الیکشن کمیشن کی جانب سے اسلام آباد سے سینیٹ کے دو کامیاب امیدواروں کے نوٹیفکیشن جاری کیے گئے جن میں رانا محمودالحسن اور اسحاق ڈار شامل ہیں۔