اسلام آباد: پاکستان تحریک انصاف کے سینیٹر شبلی فراز نے مطالبہ کیا ہے کہ پی ٹی آئی اسلام آباد کے صدر عامر مغل سمیت تمام کارکنان کو رہا کیا جائے۔

قائد حزب اختلاف سینیٹر شبلی فراز نے سینیٹ کے اجلاس اظہار خیال کرتے ہوئے کہا کہ گزشتہ اجلاس میں ہاؤس کی فنانس کمیٹی قائد حزب اختلاف کی مشاورت سے بنائے جانے کا کہا گیا، مجھ سے ہاؤس فنانس کمیٹی سے متعلق کوئی مشاورت نہیں کی گئی، ان لوگوں کو رکھا گیا جن کو ہماری پارٹی کو علم ہی نہیں۔

انہوں نے کہا کہ کل رات پی ٹی آئی کے دفتر کو غیر قانونی حملہ کیا گیا، پارٹی کارکنوں پر لاٹھی چارج کیا گیا عامر مغل کو گرفتار کیا گیا، جو بھی کر لو بانی پی ٹی آئی کا نام لوگوں کے دلوں سے نکال نہیں سکتے۔

شبلی فراز نے کہا کہ یہ صرف ہمارے ساتھ ہورہا ہے یہ ان کے ایماء پر ہو رہا ہے، یہ پی ٹی آئی کے نظری کا سیاسی مقابلہ نہیں کر سکتے تو اوچھے ہتھکنڈوں پر اتر آئے ہیں۔

انکا کہنا تھا کہ اگر فارم 47کا سلسلہ نہ ہوتا تو آپ کو اپنی حیثیت کا پتا چل جاتا ستائیس سے زیادہ نشستیں نہ ملتی، آپ فارم 47 کی حکومت ہیں سر جھکا کر چلا کریں، آپ لوگوں کے دلوں میں نفرت پیدا کر رہے ہیں۔

پی ٹی آئی کے سینیٹر نے کہا کہ ایشین ڈویلمنٹ بنک کے صدر نے کہا کہ پاکستان کی معیشت آئی سی یو میں ہے، ملک میں سیاسی عدم استحکام ہے کیسے معیشت بہتر کر سکتے ہیں، اس ماحول میں سیاسی استحکام نہیں آ سکتا۔

شبلی فراز نے مزید کہا کہ ہمارے مرکزی دفتر پر حملہ ہوا ہے یہ سیاست ہے، اگر یہ سیاست ہے تو ہم سیاست چھوڑنے کو تیار ہیں، مطالبہ کرتے ہیں ہمارے گرفتار کارکنوں کو رہا کیا جائے۔