لاہور: وزیراعلیٰ پنجاب مریم نواز شریف سے جاپانی سفیر واڈا متسوہیرو کی ملاقات ہوئی جس میں تجارت، کاروبار اور سرمایہ کاری کے تعلقات مضبوط بنانے پر تبادلہ خیال کیا گیا۔

ملاقات میں پنجاب اور جاپان کے درمیان ثقافتی اور تعلیمی وفود کے تبادلوں کا بھی جائزہ لیا گیا اور طلبہ کے فیکلٹی پروگراموں کو فروغ دینے پر بھی اصولی اتفاق کیا گیا۔

ملاقات کے دوران وزیراعلیٰ پنجاب مریم نواز نے گفتگو کرتے ہوئے کہا کہ پنجاب اور جاپان تجارت، سرمایہ کاری اور باہمی مفادات کو مدنظر رکھتے ہوئے اشتراک کارکر سکتے ہیں، جاپانی کمپنیوں کیلئے پنجاب میں سرمایہ کاری کے مفیدمواقع موجود ہیں۔

مریم نواز نے کہا کہ پنجاب بڑی کنزیومر مارکیٹ کے طور پر ابھر رہا ہے، پنجاب کی سکلڈ نوجوان افرادی قوت جاپانی اداروں میں بے مثال کارکردگی کا مظاہرہ کرسکتی ہے، دوطرفہ تعلقات کے فروغ کے لیے دونوں ممالک کے عوامی رابطے ناگزیر ہیں۔

دوسری جانب جاپانی سفیر واڈا متسوہیرو کا کہنا تھا کہ جاپان پاکستان کے ساتھ اپنے تعلقات کو بہت اہمیت دیتا ہے، ٹیکنالوجی کے فروغ کیلئے پنجاب حکومت کے ساتھ اشتراک کار کے لیے پرعزم ہیں۔

انہوں نے مزید کہا کہ گیارہ پاکستانی طلباء کو ماسٹرز اور ڈاکٹریٹ کی ڈگریوں کے لیے MEXT اسکالرشپس پر جاپان میں زیر تعلیم ہیں، پاکستان میں عوامی سماجی بہبود کے لیے جاپان کے متعدد پراجیکٹ جاری ہیں۔