وزیراعظم محمد شہباز شریف نے وزیراعظم ہاؤس میں چینی کمپنیوں کے ایک وفد سے گفتگو کے دوران چین کو پاکستان کی معاشی ترقی میں اہم شراکت دار قرار دیا ہے۔

تفصیلات کے مطابق وزیراعظم محمد شہباز شریف کی زیر صدارت ایک اہم اجلاس ہوا جس میں  پاکستان اور چین کے درمیان مختلف شعبوں میں تعاون بڑھانے کے حوالے سے جائزہ لیاگیا۔

اس اجلاس میں مختلف وفاقی وزارتوں کی جانب سے پاکستان اور چین کے درمیان دو طرفہ معاشی تعلقات کے حوالے سے تجاویز پیش کی گئیں۔

وزیر اعظم شہباز شریف نے اجلاس میں کہا کہ چینی انڈسٹری خصوصاً چینی ٹیکسٹائل  انڈسٹری کو پاکستان میں صنعتیں لگانے کی دعوت دیتے ہیں، اس کے علاوہ پاکستان چین کے ساتھ ترجیحی بنیادوں پر  زراعت، انفارمیشن ٹیکنالوجی اور توانائی کے شعبوں میں تعاون بڑھانے کے ساتھ چین میں پاکستانی مصنوعات کی برآمدات میں اضافے کا خواہاں ہے۔

شہباز شریف نے کہا کہ حکومت چینی صنعت کاروں اور سرمایہ کاروں کو ہر ممکن سہولیات فراہم کرے گی، اور پاکستان میں مقیم چینی باشندوں کو فول پروف سیکورٹی فراہم کی جائے گی، اس کے علاوہ چینی شہریوں کی سیکیورٹی کے حوالے سے جامع پلان ترتیب دیا گیا ہے۔

 وزیراعظم نے یہ بھی کہا سی پیک کے اگلے مرحلے کے حوالے سے بھرپور تیاری کر رہے ہیں جبکہ چینی تعاون سے گوادر بندرگاہ کو لاجسٹکس کا حب بنایا جائے گا، اس کے علاوہ ایگری کلچر ڈیمانسٹریشن زونز کا قیام سی پیک کے اگلے مرحلے کے حوالے سے اہم منصوبہ ہو گا۔

وزیراعظم نے متعلقہ وزارتوں کو ہدایت کی کہ وہ پاکستان چین کے تعاون کے نئے  منصوبوں کے حوالے سے تیاری کریں اور بزنس ٹو بزنس روابط بڑھائے کے لئے اقدامات اٹھائیں۔ جبکہ برآمدات بڑھانے کے حوالے سے حکمت عملی ترتیب دینے میں چین پاکستان کا مددگار ثابت ہو سکتا ہے۔