سعودی کاروباری وفد کے دورہ پاکستان کے پیش نظر وزیراعظم محمد شہباز شریف کی جانب سے وفاقی وزراء کی 16 رکنی اسٹیرنگ کمیٹی قائم کردی گئی ہے۔

ذرائع کے مطابق وزیر اعظم نے سعودی وفد کے دورے کے حوالے سے 16 رکنی اسٹیئرنگ کمیٹی تشکیل دے دی جس میں وزیر پیٹرولیم مصدق ملک کو کمیٹی کا چیئرمین مقرر کیا گیا ہے۔

ذرائع نے بتایا ہے کہ سعودی عرب میں پاکستانی سفیر، سیکریٹری خصوصی سرمایہ کاری کونسل کمیٹی کا حصہ ہیں جبکہ چیف پروٹوکول وزارت خارجہ، ڈپٹی چیئرمین پلاننگ کمیشن اور وزیر مملکت انفارمیشن ٹیکنالوجی بھی کمیٹی میں شامل ہیں۔

اس کے علاوہ وزیر صنعت و وزیر نجکاری، سیکریٹری پاور، پیٹرولیم، داخلہ، آئی ٹی، تجارت، سرمایہ کاری بورڈ کو بھی کمیٹی میں شامل کیا گیا ہے۔

ذرائع کا کہنا ہے کہ کمیٹی سعودی وفد کے لیے بزنس میٹنگز کے انتظامات کرے گی، کمیٹی کو وفد کے لیے سیکیورٹی انتظامات کرنے کا ٹاسک بھی دیا گیا جبکہ وزارت تجارت کمیٹی کے لیے سیکریٹریل سپورٹ فراہم کرے گی۔

واضح رہے کہ بڑی سعودی کمپنیوں کے سربراہان پر مشتمل وفد آج شام پاکستان پہنچے گا، سعودی عرب کی بڑی کمپنیوں کے سربراہان کے وفد میں 50 کے قریب افراد شامل ہوں گے۔

سعودی وفد میں آئی ٹی، توانائی، میرین، مائننگ کے کاروباری افراد شامل ہوں گے جبکہ ادویات سازی اور ایوی ایشن سمیت دیگر کمپنیوں کے حکام بھی شامل ہوں گے۔