اسلام آباد: وزارتِ نجکاری نے پاکستان کی قومی ایئرلائن (پی آئی اے) کی نجکاری کو سب سے پیچیدہ قرار دے دیا۔

وزارت تجارت کی جانب سے پی آئی اے کی نجکاری کی تفصیلات قومی اسمبلی میں جمع کرا دی گئی ہیں۔

تحریری جواب میں بتایا گیا کہ وفاقی کابینہ نے 09 اگست 2023 کو پی آئی اے کی نجکاری کی منظوری دی، اگست 2023 میں پارلیمان نے پاکستان انٹرنیشنل ایئر لائن کارپوریشن لمیٹیڈ ایکٹ 2016 میں ترمیم کی منظوری دی، ترمیم کے ذریعے پی آئی اے کو نجکاری پروگرام میں شامل کیا گیا۔

قومی اسمبلی میں جمع کرائی گئیں تفصیلات میں بتایا گیا کہ نجکاری کمیشن نے نومبر 2023 میں نجکاری کے لئے فنانشل ایڈوائزر مقرر کیا، پی آئی اے کی نجکاری کے لئے ای وائے کنسلٹنگ دوبئی کو فنانشل ایڈوائزر مقرر کیا گیا۔

تحریری جواب میں کہا گیا کہ نجکاری کمیشن بورڈ نے 8 اور 9 جنوری 2024 کو پی آئی اے کی اسکیم آف ارینجمنٹ کی منظوری دی، وفاقی کابینہ نے 6 فروری 2024 کو سکیم آف ارینجمنٹ کی منظوری دی جبکہ پی آئی اے بورڈ اور پی آئی اے ہولڈنگ کمپنی نے اسکیم کی منظوری مارچ 2024 میں دی۔

قومی اسمبلی کو بتایا گیا کہ 20 مارچ 2024 کو پی آئی اے ہولڈنگ کمپنی لمیٹڈ کا قیام عمل میں آیا، سیکیورٹی اینڈ ایکسچینج کمیشن آف پاکستان میں اسکیم آف ارینجمنٹ 28 مارچ 2024 فائل کیا گیا اور ایس ای سی پی نے سکیم آف ارینجمنٹ کی منظوری 3 مئی 2024 کو دی۔

وزارت تجارت نے اپنے تحریری جواب میں مزید بتایا کہ سرمایہ کار پی آئی اے کی خریداری کے لئے اسٹیٹمنٹ آف کوالیفیکیشن 17 مئی تک جمع کرا سکتے ہیں، پی آئی اے کی نجکاری کے لئے تاحال نجکاری کمیشن کے سامنے 12 سرمایہ کاروں نے دلچسپی کا اظہار کیا ہے۔