بانی پی ٹی آئی کی ویڈیو لنک کے ذریعے پیشی کیلئے اڈیالہ جیل میں انتظامات مکمل کر لئے گئے۔

سپریم کورٹ میں نیب ترامیم میں وفاقی حکومت کی انٹرا کورٹ اپیل کی سماعت آج ہوگی، حکومت نے سماعت میں ویڈیو لنک کے ذریعے بانی پی ٹی آئی کی پیشی کے انتظامات کر لیے ہیں۔

جیل ذرائع کے مطابق بانی پی ٹی آئی ویڈیو لنک پر پیش ہوتے ہیں یا نہیں، فیصلہ انہیں کرنا ہے، سپریم کورٹ کے حکم پر اڈیالہ جیل میں ویڈیو لنک کی دستیابی یقینی بنائی جائے گی۔

چیف جسٹس پاکستان کی سربراہی میں 5 رکنی لارجر بینچ آج سماعت کرے گا، جسٹس امین الدین، جسٹس جمال خان مندوخیل بینچ میں شامل ہیں،  جسٹس اطہر من اللہ، جسٹس حسن اظہر رضوی بھی لارجر بینچ کا حصہ ہیں۔

بانی پی ٹی آئی کی درخواست پر سپریم کورٹ نے نیب ترامیم کالعدم قرار دی تھیں۔

عدالت نے نیب ترامیم کے خلاف تحریری فیصلہ 15 ستمبر 2023 کو جاری کیا تھا، سابق چیف جسٹس عمر عطا بندیال کی سربراہی میں بینچ نے 2:1 کی اکثریت سے نیب ترامیم کالعدم قرار دی تھیں۔

نیب ترامیم کےخلاف کیس میں جسٹس منصور علی شاہ نے اکثریتی فیصلے سے اختلاف کیا تھا۔

سپریم کورٹ نے ختم کیے گئے تمام نیب مقدمات بحال کرتے ہوئے 10 میں سے 9 ترامیم کو کالعدم قرار دیا تھا۔

سپریم کورٹ نے نیب ترامیم کی متعدد شقوں کو آئین کے برعکس قرار دیا تھا۔

وفاقی حکومت نے 17 اکتوبر 2023 کو سپریم کورٹ کے فیصلے کے خلاف اپیل دائر کی تھی۔