کراچی میں میٹرک کا پہلا پرچہ امتحانی مرکز پر پہنچنے سے  پہلے ہی سوشل میڈیا پر آؤٹ ہوگیا۔

کراچی میں ایک سال بعد میٹرک امتحانات کا آغاز ہوتے ہی تعلیمی بورڈ کی نااہلی سامنے آگئی، پہلے ہی روز کمپیوٹر اسٹڈیز کا پرچہ مرکز پر پہنچے سے پہلے ہی 9 بج کر 25منٹ پر سوشل میڈیا پر وائرل ہوگیا۔

میٹرک بورڈ کے امتحانات میں پرچہ آؤٹ ہونے کی روایت برقرار ہے، میٹرک بورڈ کے دعوے دھرے کے دھرے رہ گئے، میٹرک کا پہلا پرچہ کمپیوٹر اسٹڈیز واٹس اپ گروپ پر وائرل ہوگیا۔

واٹس اپ گروپس میں سو فیصد درست پرچے کی فراہمی کی یقین دہانی کرائی گئی جبکہ حل شدہ پرچہ بھی گروپ میں بھیجنے کا دعوہ کیا گیا، واٹس ایپ گروپ میں پرچہ آتے ہی تھوڑی دیر میں حل شدہ پرچہ بھی آ جائے گا۔

واضح رہے کہ شہر قائد کراچی میں میٹرک کے سالانہ امتحانات کا آغاز ہوگیا، نویں اور دسویں جماعت کے رجسٹرڈ امیدواروں کی کل تعداد 3 لاکھ 65 ہزار 102 ہے۔

صبح کی شفٹ میں سائنس اور دوپہر کی شفٹ میں جنرل گروپ کے امتحانات ہوں گے، آج نہم جماعت کمپیوٹر اسٹڈیز اور دہم جماعت جنرل گروپ جنرل سائنس کا امتحان لیا جائے گا۔

ثانوی بورڈ کے امتحانات 31 مئی کو اختتام پذیر ہونگے جبکہ رواں سال امتحانی مراکز کی تعداد 505 ہے، سینٹر جیل میں بھی ایک امتحانی مرکز قائم کیا گیا ہے، سینٹرل جیل میں 22 طلبہ امتحانات میں حصہ لیں گے۔

گورنمنٹ اسکول کے امتحانی مراکزکی تعداد 148 ہے، نجی اسکولوں کے امتحانی مراکز کی تعداد 357 ہے، حب سینٹرز کی تعداد 19 ہے جو کراچی کے مختلف 18ٹاؤنز میں قائم کیے گئے ہیں۔

بورڈ آفس کے آفیسرز امتحانی پرچوں کی ترسیل پر مامور ہوں گے، جہاں سے امتحانی مراکز کے سینٹر سپرنٹنڈنٹ اپنے اپنے مراکز کے مہر بند پیکٹس وصول کریں گے۔

اس کے علاوہ حساس امتحانی مراکز 5 ٹاؤنز میں ہیں، جن میں لانڈھی، لیاری، اورنگی، بلدیہ اور کیماڑی شامل ہیں۔

محکمہ تعلیم کے ڈائریکٹر اسکولز، ایڈیشنل ڈائریکٹر، ڈپٹی ڈائریکٹر، ڈی ای اوز کے علاوہ ڈائریکٹر جنرل پرائیویٹ اسکولز کی ویجیلنس ٹیمیں اور ان کے افسران 50 ہیں۔

امتحانی مراکز کے اندر موبائل فون لانا سختی سے منع ہو گا او امتحانی مراکز کے اطراف میں امتحان کے دوران فوٹو اسٹیٹ مشینیں استعمال کرنے پر مکمل پابندی عائد ہے۔

امتحانی سینٹر کے اطراف میں دفعہ 144 نافذ کرنے کی درخواست کی ہے جبکہ کے الیکٹرک کو امتحانات کے دوران بجلی کی فراہمی یقینی بنانے کے سلسلے میں خط ارسال کیا گیا ہے اور حساس اداروں کو بھی ہم نے خط ارسال کر دیے ہیں۔

اس سال بورڈ نے تمام طلبا و طالبات اور اساتذہ کی آسانی کیلئے آن لائن کمپیوٹرائزڈ ایڈمٹ کارڈز پر امتحانی مراکز بھی پرنٹ کر دیئے ہیں۔