اسلام آباد: ترجمان دفتر خارجہ ممتاز زہرا بلوچ نے کہا ہے کہ بیرونی سفارتکاروں کو پاکستان کے اندرونی معاملات پر تبصرہ کرنے سے محتاط رہنا چاہیے۔

دفترخارجہ کی ترجمان ممتاز زہرا بلوچ نے ہفتہ وار میڈیا بریفنگ دیتے ہوئے کہا کہ سپریم کورٹ کی جانب سے خط لکھنے کے واقع کوئی اطلاعات نہیں، پاکستان، سفارتکاروں کو سفارتی آداب کو ملحوظ خاطر رکھنے پر زور دیتا ہے۔

سپریم کورٹ کا یو کے ہائی کمیشن کو خط پر ترجمان دفتر خارجہ نے ردعمل دیتے ہوئے کہا کہ سپریم کورٹ کے خط پر دفتر خارجہ کوئی رائے نہیں دیں گی، سپریم کورٹ ملک کا سب سے بڑا آئینی ادارہ ہے۔

انہوں نے کہا کہ بیرونی سفارتکاروں کو پاکستان کے اندرونی معاملات پر تبصرہ کرنے میں مختاط رہنا چاہیے، سفارت کاروں کو سفارتی آداب کا خیال رکھنا چاہیے جب بھی اس طرح کے کمینٹس پاس کریں،

ممتاز زہرا بلوچ نے کہا کہ مجھے اس سے متعلق کوئی معلومات نہیں ہے کہ دفتر خارجہ نے کوئی ایڈوائس دی ہوں، وزیر داخلہ نے جو ریمارکس دیے اس پر بات نہیں کرونگی۔

ترجمان دفتر خارجہ نے بتایا کہ چینی صدر کی دعوت پر وزیراعظم شہباز شریف چین کا 4 سے 7جون تک دورہ کر رہے ہیں، وزیراعظم کا دورہ چین تین مراحل پر مشتمل ہو گا، وزیر اعظم کے دورے کے دوران سی پیک پراجیکٹ کو اپ گریڈ کیا جائے گا۔

انکا کہنا تھا کہ پاکستان نے افغانستان کے ساتھ مختلف مواقع پر دہشت گردی کے ثبوت فراہم کیے، پرسوں کی میٹنگ میں بشام حملے کے شواہد پیش کیے گئے، پاکستان اور افغانستان کے درمیان گزشتہ روز اعلیٰ حکام کے درمیان موجودہ صورتحال پر تبادلہ خیال ہوا، مذاکرات کے دوران افغانستان سے پاکستان میں دہشتگردی کے واقعات پر بات ہوئی۔

ترجمان نے کہا کہ آذربائجان کے وزیر خارجہ نے پاکستان کا دورہ کیا اور اس دوران انہوں نے صدر اور وزیراعظم سے ملاقاتیں بھی کیں، دورے میں دونوں ممالک کے درمیان پارلیمانی وفود کے تبادلے سمیت عوامی روابط کو بڑھانے پر بات ہوئی۔

ممتاز زہرا بلوچ نے کہا کہ بیساکھی کے دن کے حوالے سے وزارت خارجہ میں تقریب کا انعقاد ہوا، سیمپوزئیم میں گندھارا کے تاریخی نوادرات کی اہمیّت کو اجاگر کیا گیا۔

انہوں نے کہا کہ پاکستان اور یونان کے درمیان مذاکرات ہوئے، پاکستان اور ہنگری کے درمیان باہمی مذاکرات کا دور ہوا، دونوں ممالک کے درمیان نئے منصوبوں سمیت باہمی تعلقات کو مزید مستحکم کرنے پر تبادلہ ہوا۔

ترجمان دفتر خارجہ نے مزید کہا کہ شوپیاں میں کشمیریوں کی دکانوں کو بھارت کی جانب سے سیل کرنا افسوسناک ہے، پاکستان اپنے کشمیریوں بھائیوں اور بہنوں سفارتی اور اخلاق حمایت جاری رکھے گا۔