اسلام آباد: وفاقی وزیر برائے پیٹرولیم مصدق ملک نے کہا ہے کہ ترقی کے سفر میں ماحول کو آلودگی سے بچانا ہوگا۔

مصدق ملک نے پاکستان انرجی سمپوزیم سے خطاب کرتے ہوئے کہا کہ پاکستان کو سیکیورٹی کے علاوہ کئی مسائل کا سامنا ہے، پاکستان میں موسمی تبدیلیوں سے بھی اثرات بڑھ رہے ہیں، ماحولیاتی تبدیلی سے سب کچھ بدل رہا ہے۔

انہوں نے کہا کہ ہمارے کسانوں کو نقصان ہورہا ہے پانی اور بارشوں کی کمی ہورہی ہے، ہمیں وقت سے پہلے اس پر کام کرنا ہوگا۔

وفاقی وزیر نے کہا کہ ہمیں کئی چیلینجز کا سامنا ہے، ہمیں پیٹرول گیس اور اپنے معدنیات کو بچانے کے لیئے پالیسیاں بنانے کی ضرورت ہے، ہم پیٹرولیم مصنوعات اور گیس ملک کے اندر سے نکالنے کے لیے کوشش کر رہے ہیں۔

انکا کہنا تھا کہ دنیا کی کمپنیوں کو تیل و گیس نکالنے کے لیے دعوت دے رہے ہیں، کمپنیوں کو پاکستانی کمپنیوں کے ساتھ جواٸنٹ وینچرکی دعوت دی ہے، سرمایہ کاروں کے لیے سسٹم کو آسان بنایا جا رہا ہے، نظام میں شفافیت کو یقینی بناٸیں گے۔

مصدق ملک نے کہاکہ پاکستان میں بزنس کے مواقع موجود ہیں، بیرون ممالک سے لوگ پاکستان آرہے ہیں، ہمیں اپنے وسائل کو بہتر طریقے سے استعمال کرنا ہے، ہماری درآمدات اور برآمدات میں توازن نہیں ہے۔

انہوں نے کہا کہ تاپی پائپ لائن منصوبے پر کام کو تیز کریں گے، اس منصوبے کی فنڈنگ کے مسائل ہیں، تاپی منصوبے سے پاکستان کو سستی گیس میسر آسکے گی، ترکمانستان سے ایل این جی درآمد کرنے پر کام جاری ہے۔

وفاقی وزیر نے مزید کہا کہ ٹائیٹ گیس پالیسی پر کام جاری ہے، گرمیوں میں بجلی کی طلب 30 ہزار میگاواٹ اورسردیوں میں آٹھ ہزار میگاواٹ ہو جاتی ہے، گیس ویل ہیڈ ریٹ پر بجلی کے لیے استعمال کی جائے بجلی کی قیمت پچاس فیصد سستی ہو سکتی ہے، کیپسٹی پیمنٹ کو کم سے کم کرنے کے لیے مختلف پہلووں سے کام جاری ہے، گیس کمپنوں کے نااہلی کو ختم کرنا ہے۔