وزیر اعظم کے مشیر رانا ثنا اللہ خان نے کہا ہے کہ نو مئی ملزمان کو اب تک سزا مل جانی چاہیے تھی، سزائیں اب تک نہ ہونا ہمارے نظام پر سوالیہ نشان ہے۔

مسلم لیگ ن کے رہنما رانا ثنا اللہ نے کابینہ اجلاس سے قبل میڈیا سے گفتگو کرتے ہوئے کہا کہ آج کا کابینہ اجلاس خصوصی طور پر نو مئی کے واقعات کی مذمت کے لیے ہے، اس واقعے کی مذمت کرتے ہیں، جن لوگوں نے یہ مجرمانہ عمل کیا انہیں اب تک سزا نہیں ہوئی۔

انہوں نے کہا کہ جب کسی آدمی کو جیل میں رکھنا مقصود ہے اسے جیل میں رکھا جانا ہی کافی ہے، اس کو سہولت دینا یا نہ دینا معنی نہیں رکھتا، اس سے پہلے کچھ لوگ جیل جانے والوں کو اس وقت برسر اقتدار لوگ انہیں اذیت دینے کی بات کرتے تھے وہ قابل مذمت عمل ہے۔

رانا ثنا اللہ نے کہا کہ جیل میں بانی پی ٹی آئی کو وہ سہولیات دی گئی ہیں اس پر قطعی کوئی اعتراض نہیں، ان کے پاس جو منصب رہا ہے اس کے مطابق اگر سہولیات ملتی ہیں تو کوئی اعتراض نہیں ۔

انکا کہنا تھا کہ نو مئی ملزمان کو اب تک سزا مل جانی چاہیے تھی، سزائیں اب تک نہ ہونا ہمارے نظام پر سوالیہ نشان ہے، کوئی فیصلہ نہیں ہو رہا، کئی سال کئی سال کیس چلتے ہیں یہ ہمارے عدالتی نظام کے نقائص ہیں، کیسوں کے جلد نمٹانے کے حوالے سے قانون سازی ہونا چاہیے۔

صحافی نے سوال کیا کہ بانی پی ٹی آئی معافی کو تیار نہیں بلکہ کہتے ہیں مجھ سے معافی مانگی جائے، جس پر رانا ثنا اللہ نے کہا کہ یہ اس کی ہٹ دھرمی، ڈھٹائی ہے اور غیر جمہوری ہی اصل مسئلے کی جڑ ہے۔