چین کے وزیر خزانہ لان فوان نے مالی استحکام کو مضبوط بنانے کی کوششوں میں پاکستان کے لیے اپنے ملک کی مسلسل حمایت جاری رکھنے کا اعادہ کیا ہے۔

نائب وزیراعظم اور وزیر خارجہ سینیٹر محمد اسحاق ڈار سے بیجنگ میں چین کے وزیر خزانہ لان فوان کی ملاقات ہوئی جس میں پاکستان اور چین کے درمیان بڑھتے ہوئے بزنس ٹو بزنس روابط کے پیش نظر مالی تعاون کو مزید بڑھانے پر تبادلہ خیال کیا گیا۔

ملاقات کے دوران اسحاق ڈار اور چینی وزیر خزانہ نے پاک چین مالیاتی اور بینکنگ تعاون کو سراہتے ہوئے اسے دونوں ممالک کے درمیان ‘آل ویدر اسٹریٹجک کوآپریٹو پارٹنرشپ’ کا مظہر قرار دیا۔

چینی وزیر خزانہ نے پاکستان کی معیشت کی مثبت رفتار کا نوٹس لیتے ہوئے اسلام آباد کے اقتصادی ایجنڈے کو سراہا اور پاکستان اور چین کے درمیان مالیاتی اور بینکنگ تعاون کو مزید گہرا کرنے میں نائب وزیر اعظم اسحاق ڈار کے تعاون کو بھی سراہا۔

اس موقع پر وزیر خارجہ اسحاق ڈار نے براہ راست غیر ملکی سرمایہ کاری کو راغب کرنے کے لیے گورننس، ریونیو اور کاروبار کرنے میں آسانی پر حکومت پاکستان کے اصلاحاتی ایجنڈے پر روشنی ڈالی۔

انہوں نے چین سے سرمایہ کاری کے حوالے سے پاکستان کی اعلیٰ ترجیح پر بھی زور دیا اور اس مقصد کے لیے جن ترجیحی شعبوں کی نشاندہی کی گئی، ان میں زراعت، آئی ٹی، کانوں اور معدنیات اور قابل تجدید توانائی شامل ہیں۔