پاکستان کے وفاقی وزیر داخلہ محسن نقوی نے ویٹی کن میں مسیحوں  کے روحانی پیشوا پوپ فرانسس سے ملاقات کے دوران کہا کہ پاکستان میں اقلیتوں کا تحفظ ہماری اولین ترجیح ہے۔

محسن نقوی ویٹی کن سٹی پہنچے جہاں انکا پرتپاک خیرمقدم کیا گیا، اس موقع پر وزیر داخلہ نے پوپ فرانسس سے ملاقات کی جس میں بین المذاہب ہم آہنگی، انٹرفیتھ ڈائیلاگ، امن اور بھائی چارے کے فروغ پر تبادلہ خیال کیا گیا۔

 اس ملاقات کے دوران پوپ فرانسس نے سانحہ جڑانوالہ کے بعدگرجا گھروں کی فوری تعمیر و مرمت کے کام کو سراہا اور کہا کہ پاکستان کی عوام  کے لئے میرا پیغام امن کا ہے، اور ہم سب کو مل کر امن کے لئے کام کرنا چاہیے۔

پوپ فرانسس نے یہ بھی کہا کہ وزیراعظم کی جانب سے پاکستان کے دورہ کی دعوت دی گئی ہے، میں پوری کوشش کروں گا کہ پاکستان کا دورہ کروں۔

پوپ فرانسس نے کہا کہ فلسطین کی صورتحال باعث تشویش ہے اور میں روزانہ رات 7 بجے فلسطین میں فلاحی کاموں میں مصروف  ورکرز سے بات کرکے اپ ڈیٹ لیتا ہوں جبکہ بین المذاہب ڈائیلاگ اور ہم آہنگی ہی مسائل کا حل ہے۔

وفاقی وزیرداخلہ محسن نقوی نے ملاقات کے دوران فلسطین ایشو پر موثر موقف اپنانے پر پوپ فرانسس کا شکریہ ادا کیا اور دہشتگردی کے خلاف جنگ میں پاکستان کی قربانیوں اور اقدامات  سے آگاہ کیا۔

وفاقی وزیرداخلہ نے پوپ فرانسس سے کہا کہ دنیا کو امن کا گہوارہ بنانے کے لیے آپ کی خدمات لائق تحسین ہیں اور جس طرح مسئلہ فلسطین کے حوالے سے آپ نے جرات مندانہ موقف اختیار کیا اسے ہر ایک نے  سراہاہے۔

محسن نقوی نے یہ بھی کہا کہ پاکستان میں اقلیتوں کا تحفظ ہماری اولین ترجیح ہے، جبکہ ہمارا دین  ہمارے نبی کریمﷺ، ہمارے قائد اعظم محمد علی جناح اور ہمارا آئین  بھی اقلیتوں کے تحفظ اور ان کا خیال رکھنے  پر زور دیتے ہیں۔

وفاقی وزیرداخلہ نے کہا کہ پاکستان میں بسنے والی اقلیتوں کو یکساں حقوق حاصل ہیں جبکہ دہشتگردی کے خلاف جنگ میں پاکستانی قوم اور افواج کی قربانیوں کی نظیر نہیں ملتی۔

اس اہم ملاقات کے دوران پوپ فرانسس نے پاکستان کی ترقی و خوشحالی کے لئے دعا کی اور پاکستانی عوام کے لئے نیک خواہشات کا اظہار کیا۔