وزیر اعظم محمد شہباز شریف نے ماحولیات کے تحفظ کے لیے اجتماعی کوششوں پر زور دیا ہے۔

ماحولیات کے عالمی دن کے موقع پر وزیر اعظم نے اپنے ٹوئٹر پر کہا کہ ہم جنگلات کی پرورش اور کاشت، گھٹتے ہوئے آبی وسائل کی بحالی کی کوششوں کے لیے فعال اقدامات کر کے اپنے ماحول کی صحت اور پائیداری پر نمایاں اثر ڈال سکتے ہیں۔

شہباز شریف نے اس ذمہ داری کو قبول کرنے اور ہمارے سیارے کے بہتر اور پائیدار مستقبل کے لیے کام کرنے کی اہمیت پر زور دیا اور ماحولیاتی چیلنجوں سے نمٹنے اور استحکام کے لیے عالمی کوششوں میں کردار ادا کرنے کے پاکستان کے عزم کا اعادہ بھی کیا ہے۔

انہوں نے کہا کہ گرین پاکستان پروگرام، لیونگ انڈس انیشی ایٹو، اور نیشنل ایڈاپٹیشن پلان جیسے اقدامات جنگلات کی کٹائی اور حیاتیاتی تنوع کے نقصانات کے مسائل سے نمٹنے، جنگلات کی کٹائی اور ماحولیاتی نظام کی بحالی کے لیے پاکستان کے عزم کو اجاگر کرتے ہیں۔

وزیر اعظم کا کہنا تھا کہ پاکستان پائیدار طویل مدتی کم کاربن ترقی کی حکمت عملی تیار کرنے پر سرگرم عمل ہے۔

انہوں نے مزید کہا کہ شجرکاری کے مضبوط پروگراموں کو نافذ کیا جا رہا ہے، ریچارج پاکستان اور پائیدار لینڈ مینجمنٹ پروگرام جیسے اقدامات پائیدار زراعت کے طریقوں کو فروغ دینے اور زمین کی تنزلی کا مقابلہ کرنے کے لیے پاکستان کی لگن کو ظاہر کرتے ہیں۔