آئندہ مالی سال کے لیے 12 ہزار 970 ارب روپے ایف بی آر ہدف مختص کرنے کی تجویز دی گئی ہے، جبکہ 3720 ارب روپے زائد ریونیو اکٹھا کرنا ہو گا۔

ذرائع ایف بی آر کے مطابق رواں مالی سال کی نسبت ڈائریکٹ ٹیکس میں 3452 ارب اور کسٹمز ڈیوٹی 267 ارب روپے زائد کے ٹیکسز لگے گے جبکہ رواں مالی سال کے اختتام تک ایف بی آر کو 160 ارب روپے کا رویونیو شارٹ فال ہو گا۔

ذرائع نے بتایا کہ نئے ریونیو اقدامات تاریخ میں پہلی مرتبہ لیے جائیں گے جس کے باعث مہنگائی بڑھنے کا خدشہ ہے جبکہ انکم ٹیکس، کیپیٹل ویلیو ٹیکس، سیلز ٹیکس گڈز اور سیلز ٹیکس سروسز، ایف ای ڈی کے لیے نئے ٹیکسز عائد کرنے کی تجویزہے۔

ذرائع ایف بی آر کے مطابق آئندہ مالی سال کے لیے ان لینڈ ریونیو کے ٹیکسز کا حجم 11 ہزار 379 ارب روپے مقرر کیا گیا ہے، جبکہ سیلز ٹیکس کی مد میں رواں مالی سال کی نسبت 1312 ارب روپے کا اضافی ٹیکس ہدف مقرر کیا گیا ہے۔

ذرائع نے بتایا کہ آئندہ مالی سال کے دوران سیلز ٹیکس کی مد میں 4919 ارب روپے اکٹھے کیے جائیں گے، اس کے علاوہ رواں مالی کے دوران سیلز ٹیکس کی مد میں 3607 ارب روپے اکٹھے ہو سکیں گے۔

ذرائع  ایف بی آر کے مطابق آئندہ مالی سال کے لیے کسٹمز ڈیوٹی کی مد میں 1591 ارب روپے کا ہدف مقرر کرنے کی تجویز ہے، جبکہ رواں مالی سال کی نسبت آئندہ مالی سال کسٹمز ڈیوٹی کی مد میں 267 ارب روپے اضافی وصول کیے جائیں گے۔