وزیر اعلیٰ خیبر پختونخوا کے مشیر برائے اطلاعات و تعلقات عامہ بیرسٹر ڈاکٹر سیف نے کہا کہ بجٹ سے مہنگائی کا نیا طوفان برپا ہوجائے گا۔

بیرسٹر ڈاکٹر سیف نے وفاقی بجٹ پر اپنا ردعمل  پیش کرتے ہوئے کہا کہ وفاقی بجٹ امیر سے امیر تر اور غریب سے غریب تر کے سوا کچھ نہیں ہے، جبکہ  قومی ادارے اونے پونے داموں بیچنا بجٹ کی زینت بنی ہے۔

انہوں نے کہا کہ پٹرول اور ڈیزل پہلے ہی سے عوام کے دسترس سے باہر ہے، بجٹ میں لیوی مزید بڑھائی گئی ہے، جبکہ پٹرولیم مصنوعات کی قیمتیں بڑھنے سے براہ راست مہنگائی میں اضافہ ہوتا ہے۔

بیرسٹر ڈاکٹر سیف نے یہ بھی کہا کہ بلاوجہ بھٹو  وکٹ کے دونوں طرف کھیل رہے ہیں، جبکہ بلاوجہ بھٹو کے بائیکاٹ کا ٹوپی ڈرامہ عوام خوب سمجھتی ہے۔

بیرسٹر ڈاکٹر سیف نے کہا کہ بلاوجہ بھٹو ڈرامے بند کرکے وضاحت کریں کہ وہ حکومت کے ساتھ ہے یا نہیں؟ پیپلز پارٹی روٹھ کر غریب دشمن بجٹ سے راہ فرار اختیار کرنے کی کوشش کررہے ہیں۔

انہوں نے یہ بھی کہا کہ اس بدترین بجٹ کے ذمہ داران دونوں پارٹیاں ہیں، جبکہ بلاوجہ بھٹو عوام کے آنکھوں میں دھول جھونکنے کی کوشش نہ کریں۔

بیرسٹر ڈاکٹر سیف نے مزید یہ بھی کہا کہ اس غریب اور عوام دشمن بجٹ کا حساب دونوں پارٹیوں کو دینا ہوگا، پہلے بجٹ میں دونوں پارٹیوں کی یہ حال ہے  آگے آگے دیکھ ہوتا ہے کیا ہے۔