وزیراعلیٰ سندھ سید مراد علی شاہ سے نیدر لینڈز  کی سفیر ہینی دی وریس نے ملاقات کی، جس میں موسمی تبدیلی  کے حوالے سے بات چیت ہوئی۔

سید مراد علی شاہ نے ملاقات کے دوران کہا کہ2022 کے تباہ کن سیلاب کی بحالی پر کام کررہے ہیں جس پر مز ہینی نے کہا کہ نیدرلینڈ  زکی زرعی بینک سندھ میں زرعی جدت کے حوالے سے قرض فراہم کرنا چاہتی ہے۔

وزیراعلیٰ سندھ نے نیدر لینڈز  کے سرمایہ کاروں کو کراچی میں ویسٹ واٹر ٹریٹمنٹ میں سرمایہ کاری کی دعوت دیتے ہوئے کہا کہ زراعت کی ترقی کے لیے سندھ حکومت نیدر لینڈز  کے ساتھ کام کرنا چاہتی ہے۔

نیدرلینڈز  کی سفیر نے ویسٹ واٹر ٹریٹمنٹ کے پراجیکٹ کی تفصیلات مانگی جس پر مراد عل شاہ نے کہا کہ سندھ حکومت محکمہ سرمایہ کاری کے آفس  سے رابطہ کرکے پراجیکٹ  کی تفصیلات  مہیا کرے گی۔

سندھ حکومت اور نیدرلینڈز نے ملاقات کے دوران ڈیری یا لائیواسٹاک کے شعبوں میں مل کر کام کرنے پر اتفاق کیا۔

وزیراعلیٰ سندھ نے ملاقات میں اقلیتوں کے حقوق کے حوالے سے بات کرتے ہوئے کہا کہ سندھ کی عوام مذہبی تفریق میں یقین نہیں رکھتے، جبکہ سندھ سے ایک ہندو ایم این اے اور ایک ایم پی اے براہ راست منتخب ہوئے ہیں اور یہ ہندو، مسلم  اکثریت والے حلقوں سے منتخب ہوئے ہیں۔

مراد علی شاہ نے ملاقات کے دوران کہا کہ پی پی پی ہر قسم کی تفریق  سے بالاتر ہوکر عوام کی خدمت پر یقین رکھتی ہے۔

وزیراعلیٰ سندھ نے یہ بھی کہا کہ سیلاب متاثرین  کے لیے روزانہ 1500 گھر بنارہے ہیں، جبکہ ہم ڈونرز  کے تعاون سے خواتین کے لیے بھی گھر بنا رہے ہیں جس کا مکمل ڈیٹا تیار کر لیا ہے۔