وزیر اعلیٰ پنجاب مریم نواز شریف نے کہا کہ الحمدللہ ستھرا پنجاب نعرہ نہیں رہا، پنجاب کی حکومت اور عوام نے کرکے دکھایا ہے۔

وزیر اعلی مریم نواز شریف کا عید کے تین دن جاری رہنے والا “آپریشن کلین اپ” آج مکمل ہو گا جبکہ عیدالاضحی پر 72 گھنٹے میں مسلسل صفائی، عرق گلاب ملے پانی سے سڑکوں، گلیوں اور راستوں کی دھلائی، آلائشیں اٹھا کر پنجاب میں سرکاری مشینری نے ناممکن کو ممکن کر دکھایا ہے۔

وزیر اعلی پنجاب نے وزیر بلدیات ذیشان رفیق، سیکرٹری وزارت بلدیات محمد شکیل کی تعریف کی، جبکہ صفائی مہم میں شریک تمام میونسپل اداروں، ویسٹ مینجمنٹ کمپنوں، ضلعی انتظامیہ، لاہور ویسٹ مینجمنٹ کمپنی کے افسران اور عملے کو بھی خراج تحسین پیش کیا۔

مریم نواز شریف نے کہا کہ حکومت، منتخب نمائندوں، اداروں، افسران اور عملے کے لئے اصل عیدی عوام کی شاباش ہے جبکہ آپ کے ٹیم ورک نے عوامی خدمت اور “یہ ممکن ہے” کی سنہری اور قابل فخر مثال قائم کردی ہے۔

وزیر اعلی پنجاب نے یہ بھی کہا کہ بڑی عید پر صفائی کا بڑا اسٹینڈرڈ بنا جسے قائم رکھنا ہے، ان شاءاللہ، اس کے علاوہ سالڈ ویسٹ مینجمنٹ کا جامع نظام لا رہے ہیں، جبکہ سب اپنی زمہ داری نبھا کر ‘ستھرا پنجاب’ کو حقیقت بنائیں گے۔

مریم نواز شریف نے شہریوں اور میڈیا کا بھی شکریہ جن  کے تعاون سے یہ ممکن ہوا، جبکہ سب نے اپنی زمہ داری خوب نبھائی ، جس کی وجہ سے نا ممکن، ممکن ہوا، الحمدللہ۔

وزیر اعلی پنجاب نے مزید یہ بھی کہا کہ آئیں ہم سب مل کر اسی جذبے اور تعاون سے ‘ستھرا پنجاب’ کو مستقل معیار بنائیں۔