میئر کراچی بیرسٹر مرتضیٰ وہاب نے کہا کہ کوشش ہوگی کہ شہریوں کو برسات کے دوران کم سے کم تکالیف کا سامنا ہو۔

بیرسٹر مرتضیٰ وہاب نے منظور کالونی، قیوم آباد، ماڑی پور، سخی حسن اور پاپوش نگر اور کے ڈی اے چورنگی سمیت دیگر برساتی نالوں کا دورہ کیا۔

دورے کے دوران مرتضیٰ وہاب نے کہا کہ نالوں کی صفائی کا آغاز کردیا گیا ہے امید ہے کہ مون سون سیزن سے قبل صفائی کے کاموں کو مکمل کرلیا جائے گا۔

میئر کراچی نے کہا کہ چاکنگ پوائنٹس کی نشاندہی کرلی گئی ہے اور ترجیحی بنیادوں پر انہیں ان چاکنگ پوائنٹس کی صفائی کی جائے گی۔

بیرسٹر مرتضیٰ وہاب یہ بھی کہا کہ کراچی کے 38 بڑے نالوں کی صفائی کا کے ایم سی مکمل کرے گی، جبکہ  مختلف علاقوں میں واقع 500 سے زائد چھوٹے نالوں کی صفائی کا کام ٹاؤن میونسپل کارپوریشنز کی ذمہ داری ہے۔

میئر کراچی نے کہا کہ مون سون سیزن میں شہریوں کو تکالیف کا سامنا نہ ہوں اور برساتی پانی کی نکاسی کا عمل تیزی سے مکمل ہونا چاہئے اس کے علاوہ مین شاہراہوں سے برساتی پانی کو فوری صاف کرنے سے ٹریفک کی روانی برقرار رہے گی۔

مرتضیٰ وہاب نے متعلقہ ادارے کو ہدایت دیتے ہوئے کہا کہ مون سون سیزن میں توقع سے زیادہ بارشوں کا امکان ہے جس کے لیے متعلقہ افسران و عملے کو فعال اور متحرک رکھا جائے جبکہ برسات کے دوران متعلقہ افسران اور عملہ سڑکوں پر نظر آنا چاہئے۔

میئر کراچی نے مزید یہ بھی کہا کہ میں خود تمام عمل کی نگرانی کروں گا اور کوشش ہوگی کہ شہریوں کو برسات کے دوران کم سے کم تکالیف سامنا ہو۔

واضح رہے کہ میئر کراچی کے برساتی نالوں کے دورہ کے موقع پر میونسپل کمشنر افضل زیدی، متعلقہ افسران بھی ان کے ہمراہ تھے۔