پاکستان میں پولیو وائرس کے 4 کیسز سامنے آنے کے بعد آج سے ملک بھر کے 66 مخصوص اضلاع میں انسدادِ پولیو مہم کا آغازہوگیا ہے جس کے دوران 16.5 ملین سے زائد بچوں کو پولیو سے بچاؤ کی ویکسین دی جائے گی۔

 آج سے شروع ہونے والی اس پولیو مہم کے دوران مختلف صوبوں کے مخصوص اضلاع جیسے پنجاب کے 6، بلوچستان کے 14،خیبر پختونخوا کے 9 اور سندھ 19 اضلاع میں پولیوں سے بچاؤ کے قطرے پلائے جائیں گے۔

اس پولیو مہم کے دوران کراچی سمیت صوبے سندھ کے 19 اضلاع  میں تقریباً 54 لاکھ بچوں کو پولیو سے بچاؤ کے قطرے پلائے جائیں گے۔

 پنجاب میں اس مہم کے دوران 64 لاکھ بچوں کو پولیو کے قطرے پلائے جائیں گے، جبکہ لاہور میں 14 ہزار سے زائد پولیو ورکرز حصّہ لیں گے۔

پشاور میں 8 لاکھ بچوں سمیت خیبر پختون خوا میں 35 لاکھ سے زیادہ بچوں کو پولیو سے بچاؤ کے قطرے پلانے کا ہدف مقرر کیا گیا ہے۔

اسی طرح اس پولیو مہم کے دوران بلوچستان میں 18 لاکھ 84 ہزار بچوں کو پولیو کے قطرے پلائے جانے تھے تاہم بلوچستان کے 6 اضلاع میں ہیٹ ویو کی  پیش گوئی کے باعث یہ مہم 5 روز کے لیے مؤخر کر دی گئی ہے۔ نصیر آباد، سبی، جعفر آباد، اوستہ محمد، ڈیرہ بگٹی اور صحبت پور میں اب یہ پولیومہم 8 جون سے شروع کرنے کا فیصلہ کیا گیا ہے۔۔

انسداد پولیو مہم کے دوران 40 ہزار سے زائد ورکر حصہ لیں گے۔ جبکہ 4 ہزار سے زائد اہلکار پولیو ٹیم کی حفاظت پر مامور ہوں گے۔

یاد رہے کہ انسداد پولیومہم 3 سے 9 جون تک جاری رہےگی۔

 ماہرین کا کہنا ہے کہ والدین پولیو مہم کے دوران اپنے بچوں کو پولیو سے بچاؤ کے قطرے لازمی پلوائیں۔