اسلام آباد: دفتر خارجہ نے کہا ہے کہ ڈھاکہ میں تمام پاکستانی طلباء محفوظ ہیں اور انہیں محفوظ مقامات پر منتقل کردیا گیا ہے۔

پاکستانی دفتر خارجہ کی ترجمان ممتاز زہرا بلوچ نے بنگلادیش کی صورت حال پر اپنے ایک بیان میں کہا کہ  ڈھاکہ میں پاکستانی مشن تمام طلباء سے رابطے میں ہے اور مشن کے ڈپٹی ہیڈ نے وہاں کے طلباء سے ملاقات کے لیے چٹاگانگ کا دورہ کیا ہے۔

ترجمان دفترخارجہ نے مزید بتایا کہ ہائی کمیشن نے طلبہ کو محفوظ مقامات پر جگہ بھی دی ہے۔

واضح رہے کہ بنگلہ دیشی دارالحکومت ڈھاکہ میں کوٹہ سسٹم کے خلاف احتجاج کے دوران پولیس سے جھڑپوں میں 105 افراد کی ہلاکت کے بعد ملک میں کرفیو نافذ کردیا گیا۔

مقامی میڈیا کی رپورٹ کے مطابق حکومت کی جانب سے مظاہروں کے دوران ہونے والی ہلاکتوں کی تحقیقات کے لیے جوڈیشل کمیشن کے قیام کا اعلان کردیا گیا ہے۔

پرتشدد مظاہروں میں پولیس اہلکاروں اور صحافیوں سمیت ڈھائی ہزار سے زائد افراد زخمی بھی ہوئے۔ ملک مکمل طور پر مفلوج ہوگیا، بسوں اورٹرینوں کی آمدروفت معطل ہوگئی۔

مشتعل طلباء نے جیل کی عمارت کوآگ لگادی جس کے باعث سیکڑوں قیدی  جیل سے فرار ہوگئے، تاہم حکومت نے حالات پر قابو پانے کے لیے ٹرین سروس، نیوزچینلز، موبائل فون اور انٹرنیٹ سروس معطل کر کے کرفیو نافذ کردیا۔

وزارت داخلہ نے ملک بھر میں کرفیو کے نفاذ اور فوج کی تعیناتی کا سرکلر جاری کردیا، جس میں کہا گیا کہ امن و عامہ اور ملک بھر میں شہریوں کی سلامتی کے لیے سندھیا ایکٹ کے تحت اسپیشل پاور ایکٹ 1974 کے مطابق کرفیو کے نفاذ پر فوری طور پر عمل درآمد ہوگا۔

سرکلر میں بتایا گیا کہ شہری علاقوں میں ڈسٹرکٹ مجسٹریٹ، ضلعی انتظامیہ اور کمشنر آف پولیس احکامات کے مطابق اس پر عمل درآمد کریں گے اور فوج کی تعیناتی کے لیے سول انتظامیہ کے ساتھ مل کر تمام ضروری اقدامات کریں گے۔

وزارت داخلہ کے شعبہ تعلقات عامہ کے افسر شریف احمد نے بتایا کہ ڈسٹرکٹ مجسٹریٹ یا پولیس کمشنر کرفیو کے دورانیے اور حالات یا ایوننگ لاء کا تعین کریں گے۔