وزیر اطلاعات پنجاب عظمیٰ بخاری نے کہا کہ 9  مئی کے ماسٹر مائنڈ اور اس کے سہولت کاروں کو کوئی معافی نہیں ملنی۔

وزیر اطلاعات پنجاب عظمیٰ بخاری نے اپنے ایک بیان میں کہا کہ فوجی تنصیبات پر حملے کروا کر شہدا کے مجسمے جلا کر اپنے وقت کا فرعون معافیاں مانگ رہا ہے، محبت کی پینگیں بڑھانا اور معافی کے پیغامات کو عمران خان کی زبان میں این آر او کہتے ہیں۔

عظمیٰ بخاری نے کہا کہ کل تک نیوٹرل ہونا جانور اور گالی تھا آج ان کو دوبارہ نیوٹرل ہونے کا کہہ رہا ہے، جس نے آج تک 9 مئی کے حملوں کی مذمت نہیں کی وہ جیل سے نکلنے کے لیے پینترے بدل رہا ہے۔

  عظمیٰ بخاری نے اپنے بیان میں یہ بھی کہا کہ درجن بھر ناکام تحریکیں فلاپ بیانیے اور روزانہ کے کٹھ پتلی شو کے بعد سرنڈر کرنا ہی بنتا تھا، دو سال سے جو بہروپیا کہہ رہا تھا میں قوم کی جنگ لڑ رہا ہوں، آج وہ پاؤں پکڑ رہا ہے۔

عظمیٰ بخاری نے کہا کہ کچھ دانشوروں کو بھی معلوم ہو گیا کہ یہ جیل سے نکلنے کے لیے ہاتھ پاؤں مار رہا تھا، پاکستان کے عوام منتظر ہیں کہ 9 مئی کے حملوں میں ملوث نامزد ملزمان کو عدالتی نظام کب کیفر کردار تک پہنچاتا۔

 عظمیٰ بخاری شہداء کے مجسمے جلانے والے اور ان کا تمسخر اڑانے والے کسی رحم اور معافی کے مستحق نہیں ہیں، جن شہداء کے مجسمے جلائے ان کے لواحقین آج بھی نظام عدل کی طرف دیکھ رہے ہیں۔