صدر مملکت آصف علی زرداری نے کہا کہ یوم عاشور حضرت امام حسینؓ کی میدان کربلا میں شہادت کی یادتازہ کرتاہے۔

حضرت امام حسین رضی اللہ تعالیٰ عنہ  کی کربلا میں یزیدی فوج کے ہاتھوں شہادت کے دن پر ملک کے چھوٹے بڑے شہروں میں مجالس کا سلسلہ جاری ہے اور  جلوس برآمد کیے جا رہے ہیں۔

یومِ عاشور کے موقع پر صدر مملکت آصف علی زرداری نے اپنے پیغام میں کہا کہ حضرت امام حسین اور ان کے وفادار ساتھی ظلم اور جبرکےخلاف ڈٹ گئے، حضرت امام حسینؓ کی شہادت میں امت مسلمہ کیلئےعظیم درس ہے۔

آصف زرداری نے کہا کہ حضرت امام حسینؓ نےمشکلات کےباوجود ظالم وجابر حکمران کے خلاف کلمہ حق بلندکیا، حضرت امام حسینؓ نےظلم کیخلاف آواز اٹھانے، آزمائشوں میں ثابت قدم رہنےکادرس دیا۔

صدر مملکت نے اپنے پیغام میں کہا کہ حضرت امام حسینؓ اور ان کے بہادر ساتھی ظلم کے خلاف مزاحمت کی عظیم مثال ہیں، آج اسلام حضرت امام حسینؓ اور ان کےرفقا کی قربانیوں کی بنا پر زندہ ہے، میدان کربلامیں قربانیاں اہل ایمان کے جذبات کو امتحان وابتلا کے وقت جلا بخشی ہیں۔

آصف زرداری نے کہا کہ آج کشمیر اور فلسطینی بھائیوں اور بہنوں کو آزمائشوں اور مصائب کاسامنا ہے، فلسطینی اور کشمیری عوام کوآزادی کیلئے سخت مشکلات کاسامنا ہے۔

صدر مملکت نے یہ بھی کہا کہ فلسطینی اور کشمیری عوام کی جدوجہدان کے پائیدار عزم واستقلال کاثبوت ہے، جبکہ واقعہ کربلا سے سبق سیکھ کر ظلم وجبر کیخلاف کھڑے ہونےکی ضرورت ہے۔

آصف زرداری نے کہا کہ قوم کے خاطر ذاتی مفادات ایک طرف رکھ کرکسی قربانی سےدریغ نہیں کرناچاہیے، پوری قوم سے صبر اور محنت کرنے اور انصاف کیلئےکھڑے ہونےکی اپیل کرتاہوں۔

صدر مملکت نے مزید یہ بھی کہا کہ ہمیں غریبوں اورناداروں کی ضروریات کاخیال رکھناچاہیے، اللہ تعالیٰ ہمیں حضرت امام حسینؓ کی پیروی کرنےکی توفیق عطافرمائے۔