کوئٹہ: بلوچستان میں حالیہ بارشوں سے 9 افراد جاں بحق ہوگئے ہیں جبکہ دیگر اضلاع میں مزید بارش متوقع ہے۔

صوبہ بلوچستان میں حالیہ ہونے والی بارشوں کے حوالے سے پی ڈی ایم اے نے رپورٹ جاری کر دی جس میں بتایا گیا کہ حالیہ بارشوں کے دوران 7 جون سے اب تک 9 افراد جاں بحق ہوئے جبکہ چھتیں اور دیواریں گرنے سمیت مختلف واقعات میں 25 سے زائد افراد زخمی بھی ہوگئے، تاہم جاں بحق اور زخمیوں میں بچے بھی شامل ہیں۔

بارش کے حوالے سے جاری اعداد و شمار کے مطابق بارشوں کے دوران صوبے کے مختلف اضلاع میں 88 مکانات مکمل جبکہ 170 کو جزوی نقصان پہنچا اور اس دوران مجموعی طور پر 1799 افراد متاثر ہوئے۔

رپورٹ میں بتایا گیا ہے کہ بلوچستان میں حالیہ بارشوں سے 17 کلومیٹر سڑکیں جبکہ 310 ایکڑ زرعی زمینیں بھی متاثر ہوئیں، تاہم مون سون بارشوں کے دوران ڈیمزکی صورتحال نارمل ہے، حب ڈیم میں پانی کی سطح 305 فٹ پر ہے جبکہ سپل وے کی سطح 340 فٹ ہے۔

اس کے علاوہ تربت کے میرانی ڈیم میں پانی کی موجودہ سطح 225 فٹ جبکہ سپل وے کی سطح 244 فٹ، سبکزئی ڈیم ژوب میں پانی کی سطح 66 فٹ اور سپل وے کی سطح 94 فٹ ہے، تاہم گوادر شادی کور ڈیم میں پانی کی سطح 43 فٹ، سوڈ ڈیم میں 24 اور آکڑہ ڈیم میں 47 فٹ ہے۔

واضح رہے کہ بلوچستان میں بارشوں سے متاثرہ اضلاع میں پی ڈی ایم اے اور ضلعی انتظامیہ کی جانب سے امداد ی سرگرمیاں جاری ہیں جبکہ مختلف اضلاع میں آئندہ 24 گھنٹوں کے دوران گرج چمک کیساتھ بارش ہونے کا امکان ہے، تاہم ژوب، کوہ سلیمان، قلات، زیارت، موسیٰ خیل، شیرانی و دیگر اضلاع میں بارشیں متوقع ہیں۔