لاہور: وزیراعلیٰ پنجاب مریم نواز شریف نے کہا ہے کہ پلاسٹک کی آلودگی کو ختم کرنا ہماری ذمہ داری ہے۔

وزیراعلیٰ مریم نواز نے “ورلڈ پلاسٹک بیگ فری ڈے” پر پیغام دیتے ہوئے کہا کہ آج ہم پنجاب میں پلاسٹک بیگ کے استعمال کو ختم کرنے کے لیے اپنے عزم کی تجدید کرتے ہیں، پلاسٹک کی آلودگی ایک بڑا ماحولیاتی خطرہ ہے اور اس مسئلے کو حل کرنے کے لیے فیصلہ کن اقدام کرنا ہماری ذمہ داری ہے۔

انہوں نے کہا کہ شہری پلاسٹک بیگ کی پیداوار، فروخت اور استعمال پر پابندی کے قانون پر عملدرآمد یقینی بنانے میں حکومت کا ساتھ دیں، ہمارا مقصد ایک پلاسٹک فری پنجاب بنانا ہے، جہاں ہماری ندیاں، پارکس اور شہر پلاسٹک کی آلودگی سے پاک ہوں۔

مریم نواز نے کہا کہ ‘نو ٹو پلاسٹک’ مہم کا مقصد پلاسٹک کی فضلہ کو کم کرنا اور پائیدار متبادل کو فروغ دینا ہے، پلاسٹک کا استعمال محدود کرنے سے ہم آنے والی نسلوں کے لیے صاف اور صحت مند ماحول کو یقینی بنا سکتے ہیں۔

انکا کہنا تھا کہ شہری پلاسٹک بیگ کی جگہ بائیو ڈی گریڈایبل بیگز استعمال کریں، پلاسٹک کے ہمارے صحت اور ماحول پر مضر اثرات کو نظر انداز نہیں کیا جا سکتا۔

وزیراعلیٰ پنجاب نے مزید کہا کہ ماحول دوست متبادل کو اپنانے سےماحولیاتی اثرات کو نمایاں طور پر کم کر سکتے ہیں، “نو ٹو پلاسٹک” مہم میں حکومتی عہدیدار، ماحولیاتی کارکنان اور عوام کا شکریہ ادا کرتی ہوں۔