اسلام آباد: وفاقی حکومت نے آپریشن عزم استحکام پر مرحلہ وار عمل درآمد کا فیصلہ کرلیا ہے۔

حکومتی ذرائع کے مطابق حکومت کی جانب سے آپریشن عزم استحکام سے متعلق تمام شراکت داروں سے مشاورت کے بعد حتمی حکمت عملی تیار کرلی گئی ہے، وفاقی حکومت دہشت گردی اور شدت پسندی کے خاتمے کیلئے نیشنل ڈائیلاگ کرے گی۔

‏ کابینہ ذرائع نے بتایا کہ وزیراعظم نے کابینہ ارکان کو آپریشن کی وجوہات اور دائرہ کار پر اعتماد میں لیا، جس کے بعد وفاقی کابینہ نے قومی ڈائیلاگ اور نئی حکمت عملی کی منظوری دے دی۔

حکومتی ذرائع کے مطابق آپریشن عزم استحکام کے دوران 30 فیصد ‪کارروائیاں جبکہ 70 فیصد ڈائیلاگ اور دیگر اقدامات ہوں گے۔

ذرائع نے مزید بتایا کہ عاشورہ محرم کے بعد قومی ڈائیلاگ کے لیے کل جماعتی کانفرنس بلائی جائے گی، وزیراعظم شہباز شریف تمام سیاسی رہنماؤں سے رابطے بھی کریں گے اور اتحادیوں کو بھی اعتماد میں لیکر آگے بڑھا جائے گا۔

واضح رہے کہ چند روز قبل وزیر اعظم شہباز شریف کی زیر صدارت نیشنل ایکشن پلان کی ایپکس کمیٹی کا اجلاس ہوا جس میں انسداد دہشت گردی کیلئے آپریشن عزم استحکام کی منظوری دی گئی تھی۔

بعد ازاں وزیر اعظم آفس نے عزم استحکام آپریشن کے حوالے سے وضاحت کی کہ بڑے پیمانے پر کسی فوجی آپریشن پرغور نہیں کیا جا رہا ہے جہاں آبادی کی نقل مکانی کی ضرورت ہو گی اور عزمِ استحکام کا مقصد پہلے سے جاری انٹیلی جنس کی بنیاد پر مسلح کارروائیوں کو مزید متحرک کرنا ہے، تاہم وزیر اعظم نے آپریشن عزم استحکام پر آل پارٹیز کانفرنس بلانے کا فیصلہ کیا ہے۔